YouTube compartirá os beneficios publicitarios con creadores españois

A Campus Party de Valencia serviu de escenario para a presentación do YouTube Partnership Program, un programa do servizo de vídeos de Google que xa leva tempo funcionando nos EE.UU. e que agora comeza a operar en España, e que consiste no reparto dos beneficios publicitarios de YouTube con usuarios do servizo seleccionados (que normalmente se corresponden con grandes creadores de contidos coma discográficas ou canles de televisión).
Na actualidade xa había uns 183 partners de YouTube en España, liderados por Cuatro, RTVE, Antena 3, Vale Music, Libertad Digital TV e Universal Music; e co anuncio de Javier Alonso, responsable de YouTube en España, entendemos que xa se oficializa esta plataforma para a explotación comercial dos vídeos na web mediante publicidade.
Dende YouTube procurarán que os partners acheguen contidos de calidade, buscando que os contidos sexan orixinais e publicados con certa frecuencia (cando menos unha vez á semana). Os usuarios aceptados no programa deberán asinar un contrato en liña e poderán asociar a súa conta en YouTube cunha conta de AdSense para recibir achegas económicas da explotación da publicidade nos seus vídeos.
YouTube procurará innovar, e así non se limitará a amosar banners na súa web, senón que tamén podería incrustar vídeos dentro de vídeos e outros tipos de creatividades que poderían dar moito xogo no futuro.