Hardware libre, Shigeru Miyamoto e Beatriz Manjón mesturaranse no Banda Ancha da Radio Galega

O programa Banda Ancha da Radio Galega, galardoado recentemente cun Premio INNOVA-G, continúa co seu labor de difusión da tecnoloxía en Galicia, polo que este sábado a partires das 15:00 horas realizará un repaso da actualidade da semana grazas á colaboración de Código Cero, aproveitando a ocasión para conversar co enxeñeiro Alejandro Taracido co gallo da celebración dun evento sobre hardware aberto que terá lugar na Coruña a semana que vén (OSHWDEM).
Neste espazo radiofónico convidouse á escritora e presentadora de televisión Beatriz Manjón, a compartir coa audiencia os seus primeiros contactos coa informática e a Internet, así como o uso que actualmente fai da tecnoloxía. Completa o programa esta semana o director de Vandal.net, Pablo Grandío, que contará algunha curiosidade sobre Shigeru Miyamoto, galardoado recentemente co Premio Príncipe de Asturias, e tamén adiantará detalles do xogo Grand Theft Auto V.