O Concello de Ribeira achegará 136.000 euros para un servizo en liña de información turística e patrimonial

O Concello de Ribeira quere ter un servizo propio para a xestión e difusión dos seus datos xeográficos de índole turística e patrimonial. Así o deu a coñecer esta semana, tal e como se pode ver no Boletín Oficial da Provincia da Coruña (en formato pdf) e no que se detalla, para a obtención do dito servizo, a apertura dun concurso para as empresas e cuxo prazo de presentación remata o día 28 deste mesmo mes. A plataforma de xestión que se quere obter, amais de divulgar información cultural e turística, tamén asumiría no seu seo a xestión dos servizos urbanos do concello. O custe do proxecto é de 136.730 euros, orzamento que provén na súa maioría (o 70%) dos Fondos FEDER.
A iniciativa, que está a ser definida como unha adaptación ao caso específico do dito concello coruñés de cousas xa feitas como o Google Maps ou o portal Sitga da Xunta, dará acubillo a unha plataforma web con dous tipos de acceso (visor web): público e privado. O xeoportal público amosará datos de tipo xeográfico ante a cidadanía, posibilitando a obtención de coñecemento local de interese. A vertente privada centrarase na xestión do propio servizo web e da achega de información para a consulta de tipo público. Incluirase tamén un Portal da Cidadanía que acubillará a achega de demandas e de actividade social e máis as bases datos dirixidas a inventariar, amosar e xeolocalizar todo o relativo ao patrimonio cultural, paisaxístico e turístico do termo municipal por enteiro.