IPglobal rétanos a demostrar os nosos coñecementos sobre a Internet

A axencia dixital IPglobal, da que temos falado en numerosas ocasións polos éxitos colleitados grazas ao seu servizo Webphone e ao seu espírito emprendedor, leva uns meses desenvolvendo unha estratexia expansiva, de xeito que esta compañía nacida na Coruña xa ten oficinas en Madrid e Londres, agardando chegar a novos mercados no futuro, e para mellorar a súa proxección dun xeito orixinal está a organizar un concurso na súa páxina de Facebook baixo o título de ¿Que sabes de Internet?, no que avalían os coñecementos sobre a Rede de resabidos dixitais, co que participarán nun sorteo de 6 prazas para un curso de marketing dixital e optarán a facerse cunha camiseta.
A semana pasada xa puidemos ver unha das camisetas deste concurso de busca de talento durante a celebración do cuarto aniversario da LaconNetwork, pois o humorista que conducía a gala, David Perdomo, lucía unha gabándose dos seus coñecementos tecnolóxicos; agora, os que queiran poder facer o mesmo, deberán seguir a IPglobal en Facebook e responder a unha serie de preguntas relativamente doadas no menor tempo posible nun test en liña cunha estética de videoxogo de 8 bits, no que se avaliará o nivel de coñecemento dos participantes e rexistrarase o tempo no que conseguiron responder correctamente todas as preguntas para figurar nun taboleiro do que os 100 primeiros cualificados teñen garantida a recepción dunha camiseta. Esta concurso en liña desenvolverase ata o vindeiro día 25, podendo participar calquera persoa maior de 18 anos que resida en España.
Con esta iniciativa dende IPglobal desenvolven un bo exemplo de acción en redes sociais que serven para captar seareiros, reter clientes e conectar coa audiencia.