O creador de Infinitoo Studios imparte en Santiago un obradoiro de desenvolvemento de apps

Os días 26, 27 e 28 de marzo terá lugar na sede da SGAE de Santiago unha actividade formativa de interese para todos aqueles que estean a valorar a posibilidade de afianzarse profesional no ámbito dos recursos para smartphones ou tablets (un ámbito de gran proxección que podería crear cinco millóns de postos de traballo nos vindeiros anos), ou ben que estean a valorar a posibilidade de ampliar a súa formación. O Obradoiro de Desenvolvemento e Creación de Aplicacións para Móbiles virá da man de Luis F. Borruey (fundador de Infinitoo Studios e creador/desenvolverdor de aplicacións para móbiles).
Segundo informa a organización (a Asociación Galega de Guionistas, AGAG, co apoio da Fundación SGAE), a actividade responde non só a un claro cambio de rumbo do mercado, que demanda cada vez máis este tipo de recursos, senón tamén a un cambio profundo nos nosos hábitos. “A aparición de smartphones e tablets”, explica a asociación, “modificaron as rutinas dos usuarios á hora de empregar as computadoras, deixando estas como unha ferramenta de traballo e situando os dispositivos móbiles no verdadeiro centro dixital tanto profesional como de lecer, que van connosco as 24 horas do día, os 7 días da semana”.
E engaden os organizadores: “O uso das apps nestes dispositivos como alternativa ás páxinas web clásicas e os servizos engadidos que poden ofrecernos como medio de comunicación social, convértenas no escenario ideal para mostrar as nosas creacións e mesmo innovar creando novos produtos que acheguen valor engadido tanto a novos como a vellos proxectos”.