Os creadores do Popcorn Time orixinal volven para manter o proxecto vivo

Nos últimos meses o nacemento e cesamento de actividade de Popcorn Time, solución que permitía ver películas e series de televisión achegados da rede de intercambio de ficheiros BitTorrent, provocou o nacemento de toda unha sería de réplicas do proxecto, que nuns casos simplemente se inspiraban nesta idea que algúns definen como “o Netflix de BitTorrent”, aínda que en non poucas ocasións trátase de aplicacións que agochan intencións máis que sospeitosas, pondo en perigo os equipos informáticos dos usuarios que instalan certos programas pensando que están ante o Popcorn Time orixinal.
Ante este confuso escenario, e pese ás medidas que contra eles emprendeu a MPAA, o Popcorn Time orixinal está de volta, e anuncia o seu retorno oficial para deixar claro que só pretenden manter o seu produto orixinal activo, corrixindo os seus fallos máis urxentes, e facilitando así a existencia dunha aplicación de streaming solvente, cun catálogo audiovisual de balde e sen publicidade, afastándose así doutros proxectos semellantes e buscando a tranquilidade dos usuarios que non queiran arriscarse a instalar malware nos seus equipos.
Os responsables de Popcorn Time inciden no feito de que a súa ferramenta xa non está a desenvolverse activamente, só está a manterse, e dan conta de que varios dos anteriores integrantes do seu equipo están agora enfocando os seus esforzos noutra nova tecnoloxía, Butter, animando aos desenvolvedores que busquen traballar neste ámbito a apoiar ao proxecto que serve de base a Popcorn Time.