A Biblioteca de Vilagarcía abre un novo servizo a demanda dos propios usuarios: o préstamo de videoxogos

A Biblioteca Municipal Rosalía de Castro (Vilagarcía) abriu un servizo que naceu da demanda dos propios usuarios: o préstamo de videoxogos. A iniciativa parte con preto de setenta títulos, dirixidos tanto a menores como a maiores, e para tres das principais consolas ou plataformas: Nintendo Swictch, PlayStation 5 e Xbox One – Xbox Serires X. A intención do Goberno local, a proposta do director do centro, é ampliar o catálogo cada dous ou tres meses.
“Todo dependerá”, sinalou o Concello, “da evolución da propia demanda pero tamén do bo uso que se faga do material en préstamo”. Neste sentido, dende o Consistorio solicitaron aos usuarios “que colaboren no coidado dos xogos e sexan respectuosos coa devolución en tempo e forma do prestado”.
Os títulos adquiridos son todos moi recentes e moi populares. Cando aínda o servizo está arrincando, nestes días xa houbo usuarios que comezaron a solicitar a cesión temporal de títulos como The Legend of Zelda e Donkey Kong Bananza, para a Nintendo; Bob Esponja: Titanes de las mareas e Spider Man II, para PlayStation; ou Mafia. El viejo continente e God of war: Ragnarök para a Xbox.
O sistema de solicitude é sinxelo: o usuario/a deberá de estar en posesión do carné da rede de bibliotecas de Galicia; nos andeis de multimedia dedicados aos videoxogos collerá a caixa (baleira) do título que lle interesa, e logo levala ao mostrador, onde o/a técnico da biblioteca lle entregará o soporte que corresponde. So se poderá retirar un título de cada vez, facilitando así que o servizo beneficie ao maior número de persoas. O prazo de préstamo é de unha soa semana, aínda que poderá ser ampliada a outra sempre e cando non exista unha reserva previa doutra persoa para o mesmo xogo.