A Comisión Europea avanza na investigación polas prácticas anti-competitivas da App Store

En 2019 Spotify denunciou ante a Comisión Europea as prácticas anti-competitivas de Apple polas comisións que impón a Spotify, que Apple Music non ten que satisfacer, o que levou a que en 2021 a Comisión asegurase que vían un abuso de posición dominante por parte de Apple nas aplicacións musicais na App Store, e agora a Comisión Europea remitiu a Apple unha declaración de obxeccións para que Apple poida clarexar as preocupacións da Comisión sobre as normas da App Store relativas aos provedores de música en streaming.
A Comisión Europea considera que Apple vulnera a competencia ao impor a súa tecnoloxía de pagamentos aos creadores de aplicacións de streaming musical (coa comisión correspondente) e impiden que os desenvolvedores poidan informar aos usuarios de métodos alternativos de subscrición sen pasar pola App Store.
A Comisión xa determinou nos seus informes preliminares que prohibición de Apple de impedir que as aplicacións para iOS informen de métodos de pagamento alternativos á App Store supón unha violación da lexislación europea, xa que esta medida non é necesaria nin proporcional, e prexudica claramente ao usuario, quen remata tendo que pagar máis polo servizo por culpa das comisións.
Polo momento non hai unha previsión do remate desta investigación da Comisión, pero cada vez resulta máis evidente que Apple terá que enfrontarse a importantes sancións e mudar a súa política actual da App Store, para favorecer a competencia.