A Comisión Europea entende que a App Store atenta á competencia no streaming musical

En marzo de 2019 Spotify presentou denuncia ante a Comisión Europea polas prácticas anticompetitivas de Apple, ao que dende Apple responderon ignorando o fondo das acusacións e asegurando que Spotify busca beneficiarse da App Store sen compensar a Apple por esta plataforma, situación que levou a que a Comisión Europea anunciase en xuño de 2020 o inicio dunha investigación por prácticas anticompetitivas da que por fin hai resultados: a Comisión Europea informou a Apple de que ven un abuso de posición dominante nas aplicacións musicais na App Store.
A Comisión Europea non considera xusto que Apple obrigue que as aplicacións para iOS teñan só poidan integrar compras a través da App Store (das que Apple leva comisións que poderían considerarse abusivas) e tampouco facilite que as aplicacións informen de métodos de pagamento alternativos de xeito explícito, prexudicando así tanto as servizos coma aos consumidores.
Margrethe Vestager destacou que o grande problema está en que Apple controla as aplicacións dispoñibles para iPhone e iPad a través da App Store, e ao lanzar o servizo de Apple Music pasou a competir con outras aplicacións de streaming ás que cóbralles elevadas comisións que o seu propio servizo non ten que soportar, o que dá lugar a un escenario que atenta á competencia.
A Comisión Europea comunica a Apple que atopou problemas especialmente con 2 elementos que afectan ás aplicacións de streaming musical: a obriga de utilizar a plataforma de pagamentos de Apple (con comisións do 30%) de querer pagar directamente dende a aplicación; e as restricións para que as aplicacións informen de sistemas de pagamento alternativos.
Actualmente Spotify ofrece subscricións individuais por 9,99 euros/mes que, de pagarse a través da aplicación para iOS teñen que subir a 12,99 euros/mes para afrontar as comisións impostas por Apple, situación que podería entenderse sempre que no momento do pagamento a aplicación móbil puidese incluír unha opción alternativa que remitise á súa páxina web para poder beneficiarse do prezo sen as comisións da App Store, algo que Apple prohibe expresamente, o que as autoridades da competencia consideran que dana claramente a competencia.
Queda agora por ver se Apple mudará as súas prácticas, e as sancións que a Comisión Europea establecerá por un abuso de posición dominante que semella bastante claro.