A Deputación de Ourense axiliza o mantemento das súas estradas mediante a robotización de avisos

A Deputación de Ourense avanza na súa estratexia de modernización dixital coa incorporación dun sistema de Automatización Robótica de Procesos (RPA) na Área de Infraestruturas, que permite poñer en marcha un “robot de software” deseñado para tramitar, de forma automática, as notificacións dos expedientes de poda e tala de árbores nas marxes das estradas provinciais.
A tramitación dos expedientes está dirixida especificamente a aquelas árbores e elementos vexetais que poñen en perigo a seguridade viaria, ben polo seu risco de caída sobre a vía ou por invadir a calzada e dificultar a visibilidade e o tránsito dos vehículos.
Ata o de agora, o cruce de datos, a xeración dos avisos e a tramitación para requirir aos propietarios a corta ou poda desta vexetación supoñía “unha enorme carga de traballo administrativo manual”, informou a institución provincial, engadindo que “sa partir deste momento, o robot tecnolóxico encárgase de interactuar de xeito autónomo cos sistemas informáticos da Deputación, xerar os documentos de notificación e tramitalos de forma rápida, continua e sen marxe de erro”.
A Deputación sinala tamén que “a aplicación da tecnoloxía RPA a este tipo de procedementos achega beneficios inmediatos tanto para a administración como para a cidadanía, xa que ofrece unha maior seguridade nas estradas, axiliza os procedementos e optimiza o talento humano”.
Ao acelerar os avisos aos donos das fincas, “garántese unha intervención moito máis rápida sobre a vexetación perigosa, minimizando o risco de accidentes derivados da caída de pólas, troncos ou a redución do ancho da calzada”, apuntan fontes da entidade, salientando a redución dos tempos de xestión, “o que permite que os requirimentos cheguen moito antes aos cidadáns e se libere ao persoal empregado público dos labores burocráticos, permitíndolles destinar o seu tempo e coñecementos a tarefas de maior valor engadido, como a inspección técnica sobre o terreo e a vixilancia da rede viaria provincial”.