A Politécnica de Ferrol organiza a súa V Olimpíada Robótica o 17 de abril

A Escola Politécnica de Enxeñaría de Ferrol (EPEF), organiza a súa V Olimpíada Robótica o vindeiro 17 de abril. Farao en colaboración co Campus Industrial da Universidade da Coruña (UDC), no Pavillón Municipal de Esteiro. Trátase dun campionato dirixido ao alumnado da ESO de toda Galicia.
Ao longo da xornada, o alumnado participante, divido en grupos de entre 3 e 6 mozos e mozas, terá que superar tres retos: un segue liñas con obstáculos, a proba do varredor e unha competición de sumo. O estudantado de 1º e 2º da ESO competirá na Categoría Promesas e o de 2º e 3º na Categoría Elite. 
Na proba do segue liñas, o robot debe seguir unha traxectoria impresa e salvar aqueles obstáculos que se impoñan no seu camiño. No varredor, o alumnado terá que empregar algoritmos similares aos que usan as aspiradoras ou as máquinas de cortar o céspede e varrer todos os obxectos do taboleiro. Por último, na competición de sumo, os equipos medirán as súas forzas nun cara a cara no que deberán expulsar ao robot contrario do taboleiro de xogo.
O centros educativos interesados en participar nesta V Olimpíada Robótica deberán inscribirse vía web antes das 23:59 horas do domingo 15 de marzo.