A aplicación galega Tilín Tilín axúdanos na procura da parella ideal
xoves, 28 de xaneiro do 2016
Entre as iniciativas innovadoras que se están a
impulsar este ano ao
abeiro da aceleradora VíaGalicia atópase o desenvolvemento
dunha tecnoloxía directamente encamiñada a “xerar felicidade”.
Trátase de Tilín Tilín, unha
aplicación de telefonía móbil que, como indica o seu propio nome,
axuda aos usuarios a atopar aquelas persoas coas que sintonizan
mellor. A ferramenta, impulsada
por dous emprendedores de Lugo (Javier e Miguel Morandeira) forma
parte dos proxectos de Lugo que aspiran a seren finalistas en
VíaGalicia, un programa da Zona Franca de Vigo e da Xunta que
abrangue axudas de até 125.000 euros. A aplicación preséntase
perante o mundo como unha tecnoloxía “para coquetear con
discreción e sinxeleza”.
Podemos descargala se somos maiores de dezaseis anos
e, a partir de aí, non hai límite de idade. Para tirarlle partido
“só teremos que elixir un dos contados da nosa axenda cos que
queiramos ter algo máis ca unha relación de amizade, e premer sobre
o seu nome facendo tilín”. O funcionamento, a partir de aí,
é en boa medida semellante ao que adoita acontecer na vida off
line, pero desta volta coa axuda do móbil e dos novos recursos
de comunicación: se temos sorte, a persoa elixida tamén premerá no
noso perfil e abrirá un chat, unha conversa particular na que
“poderemos propoñer actividades variadas para realizar de maneira
conxunta e coñecernos un pouco máis”.
A aplicación galega, que é de balde, xurdiu co
seguinte obxectivo: dar forma a unha rede social que sexa quen de
establecer polo menos dúas parellas por cada 40 usuarios
rexistrados. Segundo fan saber os seus impulsores, do que se trata é
de “facer doado o difícil”. Ou sexa, de facilitar ao máximo o
en ocasións complexo labor de tentar establecer amizade con outra
persoa. A aplicación, de feito, permite iniciar comunicacións coa
persoa da nosa axenda “pola que sempre sentimos predilección”. A
gran vantaxe é que non se desvelará a nosa identidade se a outra
persoa non se apunta tamén a facer tilín.