A futura Xbox poderá correr xogos de PC

Microsoft aproveitou o marco da Game Developers Conference (GDC) para ofrecer novas pistas sobre o futuro do ecosistema Xbox. Jason Ronald, vicepresidente de Next Generation en Xbox, avanzou algúns detalles do proxecto que dará forma á próxima xeración de hardware da compañía, coñecido polo momento como Project Helix.
Segundo explicou Ronald, este novo sistema está concibido para executar tanto xogos de consola como de PC, combinando alto rendemento con unha maior integración entre plataformas. A iniciativa forma parte da estratexia de Microsoft para consolidar un ecosistema de xogo máis flexible, no que os títulos poidan moverse con facilidade entre distintos dispositivos.
Project Helix está a ser desenvolvido no marco dun acordo plurianual con AMD e contará cun sistema en chip (SoC) personalizado deseñado especificamente para a nova xeración de tecnoloxías gráficas. O hardware foi co-deseñado para aproveitar as futuras evolucións de DirectX e da tecnoloxía de reescalado FSR, co obxectivo de mellorar de maneira significativa a capacidade de renderización e simulación.
Entre as melloras previstas figura un salto de orde de magnitude no rendemento do trazado de raios, así como a integración de sistemas de intelixencia directamente na cadea de procesamento gráfico e computacional. Estas innovacións permitirán crear mundos máis realistas, dinámicos e inmersivos para os xogadores.
A compañía de Redmond tamén confirmou que as primeiras versións alfa do hardware serán enviadas aos estudios de desenvolvemento a partir de 2027, un paso habitual no proceso de creación dunha nova plataforma de videoxogos.

Compatibilidade e ecosistema multiplataforma

Microsoft tamén reiterou o seu compromiso coa compatibilidade entre xeracións. Asegura que seguirá garantindo que os xogos de ata catro xeracións de Xbox continúen sendo accesibles no futuro. Coincidindo co 25º aniversario da marca, previsto para este ano, a compañía anunciou que presentará novas formas de acceder a algúns dos títulos máis emblemáticos da súa historia.
Outro dos eixos estratéxicos é a eliminación das barreiras entre PC e consola. Microsoft pretende simplificar o desenvolvemento de xogos para o seu ecosistema e facilitar que os estudios poidan publicar os seus títulos en múltiples dispositivos sen incrementar significativamente os custos de produción.
Tamén confirman estar a trasladar parte da experiencia do sistema operativo das consolas Xbox a Windows. Tras unha primeira versión experimental para ROG Xbox Ally, Microsoft anunciou que introducirá en Windows 11 un novo modo Xbox que permitirá alternar facilmente entre o uso tradicional do sistema e unha interface optimizada para xogar con mando e a pantalla completa. Este modo comezará a despregarse en abril en determinados mercados.