A rede iCousas incorpórase ao catálogo de servizos dixitais dirixido aos concellos

A Administración autonómica integra a rede iCousas ao catálogo de servizos dixitais a disposición dos concellos, no marco do convenio de colaboración coa Federación Galega de Municipios e Provincias (Fegamp), co obxectivo de garantir que todos os municipios, con independencia do seu tamaño, poidan acceder a ferramentas tecnolóxicas avanzadas sen que iso implique un custo adicional para as arcas municipais.
A inclusión da rede iCousas abordouse na sesión de constitución da comisión de seguimento do acordo, na que participaron o director da AMTEGA, Damián Rey, e a directora xeral de Administración Local da Consellería de Presidencia, Xustiza e Deportes, Natalia Prieto, xunto con representantes da Fegamp.

Rede iCousas: sensorización intelixente do territorio

A rede iCousas conta con máis de 300 puntos de acceso distribuídos por Galicia, que permiten a conexión de dispositivos e sensores IoT, así como a xestión en tempo real da información recollida a través dunha plataforma específica.
Esta infraestrutura posibilita a monitorización do territorio e de diferentes variables ambientais, facilita a optimización dos servizos públicos e contribúe a mellorar a toma de decisións. Ademais, impulsa a dixitalización do medio rural, favorecendo a cohesión territorial e a fixación de poboación.

Ampliación do catálogo de servizos

Coa incorporación de iCousas, o catálogo supera os 25 servizos de administración dixital empregados de maneira xeneralizada polas entidades locais galegas.
Os 313 concellos teñen acceso á Rede Corporativa da Xunta, á Historia Social Única Electrónica e ao Sistema de información para a xestión de axudas á dependencia (SIGAD). Pola súa banda, 306 concellos empregan o Sistema de Información de Usuarios de Servizos Sociais de Galicia.
No ámbito da contratación pública, 259 entidades utilizan a Plataforma de Contratos Públicos de Galicia e 124 recorren ao sistema de licitación electrónica SiLEX para a tramitación dixital dos expedientes.
En materia de interoperabilidade, arredor de 200 entidades están integradas en PasaXe!, a plataforma que permite o intercambio seguro de datos entre administracións. Ademais, máis de 200 entidades, entre elas medio cento de oficinas de rexistro, empregan os servizos de identidade dixital proporcionados pola Xunta, e 76 administracións locais realizan as notificacións electrónicas á cidadanía a través de Notifica.gal.
Tamén destaca o uso doutras ferramentas sectoriais: 310 concellos dispoñen do Rexistro de licenzas e autorizacións interurbanas de taxi; 215 concellos e 273 centros de lectura utilizan o Catálogo colectivo da Rede Pública de Bibliotecas de Galicia; 136 concellos empregan o Rexistro de informe de avaliación de edificios; 110 entidades están integradas no Rexistro das policías locais de Galicia; e 84 contan co sistema de xestión de centros de información á muller.
A través da AMTEGA, a Xunta ofrece igualmente ás entidades locais servizos especializados en seguridade da información, ciberseguridade e protección de datos persoais, xunto con solucións de computación na nube, co propósito de reforzar a resiliencia dixital das administracións fronte ao aumento das ameazas tecnolóxicas.
No eido da capacitación dixital, 90 concellos manteñen aulas CeMIT en colaboración coa Xunta.

Investimento en 2025

Este conxunto de actuacións enmárcase nun modelo de gobernanza dixital compartida que en 2025 contou cun investimento de 4,5 millóns de euros por parte da Xunta. Do total, o 35,16 % destinouse a servizos de ciberseguridade; o 39,48 % ao desenvolvemento e mantemento de sistemas e servizos tecnolóxicos; e o 25,37 % á rede de aulas CeMIT.