A resposta de Elon Musk ás empresas suspenderon a publicidade en X: «FÓ-DE-TE»

xoves, 30 de novembro do 2023 Marcus Fernández

Nas últimas horas Elon Musk participou no cumio DealBook organizado por The New York Times, onde tras desculparse pola publicación na que apoiou unha teoría da conspiración antisemita que levou á retirada da publicidade por parte de numerosas grandes marcas, soltou unhas declaracións totalmente fóra de ton que poderían ter unhas consecuencias nefastas para o futuro de X/Twitter.
Concretamente Musk dirixiuse aos anunciantes que interromperon a publicidade en X/Twitter dicindo «Non vos anunciedes. Se alguén vai chantaxearme con publicidade, chantaxearme con cartos... Fódevos! FO-DE-VOS. Está claro? Espero que si».
The New York Times asegura que o número de grandes anunciantes (incluíndo Disney, Apple e IBM) que deixaron de anunciarse en X/Twitter pola polémica antisemita de Musk está no contorno dos 200, o que podería chegar a custarlle á compañía até 75 millóns de dólares este trimestre segundo documentos internos da compañía. Musk incluso chega a dicir que de manterse o boicot X podería ir á bancarrota, negando a súa responsabilidade no asunto e culpando directamente ás marcas.
Ante as polémicas declaracións de Musk, a directora xeral de X, Linda Yaccarino, que é quen trata directamente cos grandes anunciantes, defendeu dun xeito ridículo das declaracións do seu xefe como «un punto de vista explícito sobre a nosa postura». Yaccarino asegura que X facilita información independente, o que pode incomodar a algúns, salientando a súa postura en defensa da liberdade de expresión, pero obviando que os problemas desta volta non están na case inexistente moderación na plataforma, senón na falla de autocontrol por parte de Elon Musk, que non cesa de ser polémico dentro e fóra de X, facendo que os anunciantes queiran marcar distancias.

Momento no que Elon Musk fai as súas polémicas declaracións no cumio DealBook

PUBLICIDADE