A segunda edición da bolsa Nacho Mirás premia un documental interactivo sobre a feira galega
venres, 30 de xuño do 2017
A
segunda edición da bolsa Nacho Mirás para novos titulados de
Xornalismo vén de recoñecer os valores dun proxecto de documental
web sobre as feiras de Galicia. A
proposta de documental, titulado precisamente Feira, vén da
man de Laura Santos Esmorís e Jorge Vázquez Herrero. Trátase
dun audiovisual web interactivo sobre o rol que desenvolven estas
xuntanzas locais na Galicia dos nosos días (un rol, en palabras de
Laura e Jorge, que malia todo o que acontecido na historia recente da
nosa terra, “aínda segue a ser relevante”). En base ao dito
recoñecemento, o proxecto recibirá un apoio de 6.000 euros. A dita
bolsa vén da man do Colexio Profesional de Xornalistas de Galicia e
conta co patrocinio de ABANCA e a colaboración da Facultade de
Ciencias da Comunicación da Universidade de Santiago de Compostela.
Segundo
conta o Colexio de Xornalistas, o eixo principal da obra baséase no
rexistro de diferentes actividades da feira e do seu valor como
espazo de encontro e convivencia. A entidade profesional tamén
explica que os contidos, a xeito de breves pílulas de vídeo,
tomarán diversas formas no documental: postais nas que hai unha
observación estática sobre un aspecto concreto da feira, planos en
movemento que mostran un percorrido, os planos de entrevista onde as
personaxes contan as súas visións e miradas sobre a feira a día de
hoxe, e planos detalle para mostrar accións e produtos.
Como
dixemos, os autores do proxecto son Laura Santos Esmorís, graduada
en Comunicación Audiovisual pola Universidade da Coruña que
traballa no ámbito das artes gráficas, a maquetación dixital e a
produción de eventos; e Jorge Vázquez Herrero, graduado tamén en
Comunicación Audiovisual pola mesma universidade e mestrado en
Comunicación e Industrias Creativas pola Universidade de Santiago de
Compostela, que na actualidade está a traballar como investigador
predoutoral da USC na non ficción interactiva e a innovación nos
medios.
O
proxecto gañador recibirá 6.000 euros para o seu desenvolvemento. O
xurado estivo formado por Francisco X. González Sarria, decano; Xosé
Manuel Pereiro, vicedecano e Darío Janeiro, secretario do CPXG;
Isaac González, de Abanca; Xosé López da Facultade de Ciencias da
Comunicación da USC; e os xornalistas Ainhoa Apestegui, Xoán Soler
e Fernando Varela.