A xestión do tráfico de Vigo porá en xogo unha manchea de infraestruturas para os coches smart
xoves, 6 de xuño do 2019
O
Concello de Vigo vén de adxudicar, para os vindeiros oito anos e cun
orzamento de 35,6 millóns, a xestión do tráfico da cidade. A
gran novidade é que no proxecto contémplase a “máxima capacidade
tecnolóxica para os coches intelixentes”, dotando das
infraestruturas precisas a súa proliferación no espazo urbano
vigués e facendo posíbel a interacción entre a cidade e os propios
vehículos smart. A través do proxecto xestionaranse tamén a
sala de tráfico, a rede semafórica, os accesos de automóbiles á
zona vella e máis os túneles. Haberá cámaras e sensores
bluetooth en diversos recantos da cidade.
Na
súa sesión do pasado 4 de xuño, a xunta de Goberno local adxudicou
a contratación de servizos de xestión integral e mantemento de
sistemas de regulación e control do tráfico no Concello de Vigo, á
unión temporal das empresas Esycsa e Etra. O orzamento será, como
dixemos, de 35,6 millóns e oito anos e medio de contrato.
Segundo
informou o Concello, estipulouse dende o comezo a necesidade de
“facer da urbe unha Cidade Intelixente, esixindo da concesionaria
que puxera en marcha a rede que permita a integración dos coches
intelixentes, cun sistema de comunicación entre vehículos e
infraestruturas”. Grazas a isto será posíbel facer cousas como
permitir que os semáforos se abran á chegada de vehículos de
emerxencias.
Ademais,
o concurso público local determina o desenvolvemento dun sistema de
medición de fluxos de peóns e ciclistas na cidade, sensores que
detecten a chegada de persoas aos pasos de peóns ou a instalación
de avisadores acústicos para invidentes en todos os novos semáforos
que se instalen en Vigo, que se poderán activar desde o teléfono
móbil.