ABANCA Innova preselecciona 13 proxectos para o seu programa de aceleración de start-ups

ABANCA Innova pechou a fase previa do seu proceso de aceleración de start-ups e, como resultado, ABANCA, que para a xestión da súa aceleradora de empresas conta coa colaboración de Conector Startup Accelerator, preseleccionou 13 proxectos entre o conxunto de candidaturas recibidas.
Estas 13 propostas pasan á seguinte fase, denominada Start-Up Day, celebrada hoxe e a partires da que un panel de expertos formado por socios e mentores de Conector e directivos de ABANCA escollerá a listaxe definitiva de proxectos que participarán no Programa de Aceleración ABANCA Innova by Conector.
A través do seu paso polo Programa de Aceleración ABANCA Innova by Conector, os proxectos participantes recibirán apoio financeiro (préstamos participativos de ata 20.000 euros) e asesoramento en materia de xestión (en áreas como marketing, vendas, finanzas, estratexia, etc.) para desenvolver o seu potencial e acelerar o seu crecemento.

Apoio ao emprendemento tecnolóxico

O Programa de Aceleración ABANCA Innova by Conector, iniciativa presentada en sociedade hai pouco máis dun mes, é un dos compoñentes fundamentais de ABANCA Innova, iniciativa lanzada pola entidade financeira para fomentar o desenvolvemento das novas tecnoloxías e o emprendemento ao redor delas.
Localizado no ecosistema empresarial do Polígono de POCOMACO na Coruña, ABANCA Innova desenvolve diversas actuacións de conexión entre o coñecemento tecnolóxico e o mercado, como a posta en marcha de centros de excelencia en tecnoloxías emerxentes, o desenvolvemento de accións de formación e mentoring, a colaboración con redes de difusión de coñecemento, universidades e emprendedores, e a actividade de incubadora de empresas.