AGAFPU organiza un curso de comercio electrónico para emprendedores e profesionais das TIC e a comunicación
xoves, 3 de outubro do 2013
A Asociación Galega para a Formación Publicitaria
(AGAFPU) vén de informar que
ten entre mans unha interesante actividade formativa para preparar
aos nosos profesionais e empresas para o cada vez máis transitado (e
potencialmente cheo de posibilidades empresariais) camiño do
comercio electrónico. O curso, que se celebra os sábados 19 e 26
de outubro e 9 e 16 de novembro en Santiago de Compostela e en
horario de mañá, desenvolverase baixo o seguinte epígrafe:
Lanzamento, Xestión e Marketing para Comercio Electrónico. As
claves do éxito. A actividade vai dirixida a deseñadores web e
responsábeis de comunicación, vendas en liña e mercadotecnia,
amais de emprendedores interesados en mergullarse no mercado online
ou en mellorar as súas vendas a través de estas canles
tecnolóxicas.
O curso, en palabras dos responsábeis de AGAFPU,
diríxese a dar a coñecer dun xeito práctico e ameno os
coñecementos básicos para a posta en marcha e xestión dunha tenda
de comercio electrónico. A clave será descubrir as principais
ferramentas “para desenvolverse con éxito no xa estendido comercio
electrónico español”, engade a asociación. As clases
impartiranse os días devanditos no local que a plataforma
profesional de formación publicitaria ten en Santiago, no número 42
da avenida Rosalía de Castro.