Ábrese á inscrición á vindeira edición de Coruña Bloggers
luns, 13 de febreiro do 2017
O vindeiro 22 de febreiro será a sétima
edición de Coruña Bloggers, encontro con carácter solidario (os asistentes
deben acudir cun mínimo de 1 quilogramo de alimentos non perecedoiros para a
Cociña Económica) que xunta a interesados no mundo dos blogs para asistir a
dous relatorios formativos e continuar logo cunha sesións de networking nun local hostaleiro próximo.
Para poder acudir a este evento abriuse
hoxe a inscrición, recomendándose que se realice a reserva de praza o antes
posible, xa que desta volta o encontro non terá lugar no salón de actos da
Fundación Barrié, senón noutra sala do mesmo edificio, cunha capacidade máxima
para 100 persoas, polo que o aforo é inferior ao habitual.
Os relatores desta nova edición de Coruña Bloggers serán Marta Falcón, deseñadora de servizos, e Víctor Salgado, avogado
especialista en dereito informático e comunitario, que abordarán temas tan
interesantes como o xeito de atopar a diferenciación dun blog e como ter un blog
que respecte a lexislación actual.
Completará a xornada un sorteo con agasallos achegados pola tenda en liña
Opirata.com, dun par de sesións fotográficas, dun lote de produtos de beleza e
dun curso de creación de blogs.