Ampla presenza das TIC nos premios á innovación empresarial da Universidade de Santiago

Os integrantes do proxecto gañador do primeiro premio/ Foto de Santi Alvite

A edición número once do Concurso de Proxectos Empresariais Innovadores da Universidade de Santiago ten sabor tecnolóxico-dixital. De feito, o primeiro premio foi dar un proxecto que axunta recursos lingüísticos e ferramentas informáticas. Todo isto encamiñado a unha das grandes materias pendentes do noso tempo, por moito que se teña avanzado dende xigantes como Google ou Yahoo!: afinar ao máximo as buscas e conseguir que a operación de procura sexa de verdade rendible entre tanta información que non vale ren. O proxecto, que se encamiña á creación de motores de busca en corpus lingüísticos, vén da man da firma Cilenis, impulsada dende os viveiros da USC, tendo o seu xermolo no labor de investigación do grupo GE/ProlNat (Procesamento da Lingua Natural) de Filoloxía.
A iniciativa empresarial, aínda un proxecto en desenvolvemento con potencial importante de negocio (cousa que valorou especialmente o xurado), está a piques de entrar nunha nova fase de traballo, tirando partido das novas tecnoloxías aplicadas á lingua para a recuperación de datos e procura de recursos lingüísticos para o deseño de novos recursos en galego, portugués, castelán, inglés e francés.
O premio foi entregado polo reitor Juan Casares no transcurso dun acto institucional, de peche da edición 11 do certame, desenvolvido no Colexio de San Xerome. Para recoller a distinción acudiron tamén os responsables do proxecto, entre os que se contan Pablo Gamallo, doutor pola USC; Marta Muñoz e Iria del Río, licenciadas pola Universidade de Salamanca; Marcos García, licenciado da USC; Isaac José González, enxeñeiro técnico da Universidade da Coruña; Luis Magariños, licenciados da Universidade de Vigo. Os impulsores desta idea empresarial recibiron un premio de 5.000 euros máis a opción de acceder a outros 24.000 de préstamos participativo a cargo de Unirisco Galicia SRC.
Sobre os restantes galardóns, cómpre subliñar o recoñecemento dado a Biostat, que se fixo co segundo premio (3.000 euros) e co galardón especial Muller Emprendedora polo gran potencial da súa proposta, unha empresa especializada na achega de servizos de bioestatística para os sectores ligados á investigación médica, biolóxica e científica en xeral, buscando tirar proveito do interese cada vez maior na formación no eido estatístico asociado á I+D. Trátase dun proxecto que abrolla do grupo multidisciplinar GRID ECMB (Grupo Interdisciplinario de Estatística, Computación, Medicina e Bioloxía). Tras esta iniciativa atópanse a catedrática da USC Carmen Cadarso; o doutor en Bioloxía pola USC, Vicente Lustres; a licenciada en Matemáticas pola USC, Isabel Mª Martínez; e a diplomada en Estatística pola Universidade de Salamanca, Altea Lorenzo.
O Premio Empresa Xove, que supón a entrega de 2.000 euros, recaeu nesta edición en www.plasae.com, portal web orientado ás pequenas e empresas do que xa temos falado polo miúdo en Código Cero (con motivo da súa presentación en Santiago) e que entre outras cousas oriéntase a facilitar a optimización, no seo das empresas, de todo o material tecnolóxico e de programación ao que dean acubillo, sinalando que se pode potenciar e que suprimir e achegando informes constantes de recursos e viabilidades para a toma de decisións. Este é un proxecto que promove o licenciado en Administración e Dirección de Empresas pola USC José Higinio García, que ademais contará coa participación como socios estratéxicos do catedrático da Universidade da Coruña Antonio Grandío, e de Cokidoo, Planificación Jurídica, Audicon, Wike e de Microsoft.
A maiores dos premios entregados, a licenciada pola USC Ana Paula Martínez recibiu o galardón na categoría Proxecto Emprendemento Social (2.000 euros) por CAFI. Psicoloxía, familia e adopción, entendido como “un centro de atención familiar e infantil que oferta servizos psicolóxicos destinados ás familias e persoas que a título individual necesiten axuda especializada para resolver problemas de índole intrapersoal ou relacional”, informa a USC.