Android incorpora novas funcións para compartir localización e recuperar equipaxes perdidas

Google anunciou unha nova actualización de Android que introduce varias funcións destinadas a facilitar a comunicación, mellorar a xestión de obxectos perdidos e simplificar o descubrimento de aplicacións. As novidades inclúen a integración do servizo Find Hub en Google Messages para compartir a localización en tempo real, ferramentas para recuperar equipaxe extraviada nos aeroportos, novas formas de explorar aplicacións en Google Play mediante vídeos curtos e opcións adicionais de personalización nas chamadas.
Unha das novidades máis destacadas é a posibilidade de compartir a localización directamente nas conversas de Google Messages. Grazas á integración con Find Hub, os usuarios poden enviar a súa posición e visualizala nun mapa en tempo real sen saír do chat. Esta función resulta especialmente útil para encontros en eventos, concertos ou recollidas en aeroportos, e permite controlar en todo momento a duración do acceso á localización, que pode interromperse cando se desexe.
Outra das funcións presentadas busca facilitar a recuperación de equipaxe perdida durante as viaxes. Se unha maleta conta cunha etiqueta de seguimento compatible co sistema Find Hub, o usuario pode xerar unha ligazón segura coa súa localización e compartila coa compañía aérea correspondente. A aeroliña poderá consultar esa información actualizada para localizar a equipaxe e informar ao pasaxeiro do seu estado. As ligazóns están cifradas, poden desactivarse en calquera momento e caducan automaticamente tras sete días.
Esta nova funcionalidade está xa integrada nos principais sistemas de rastrexo de equipaxes empregados pola industria aérea, como WorldTracer e NetTracer, grazas á colaboración con SITA e Reunitus. Ademais, máis de dez compañías aéreas internacionais aceptan xa este tipo de localizacións no proceso de recuperación de equipaxe, entre elas AJet, Air India, China Airlines, Saudia, Turkish Airlines, Scandinavian Airlines ou o grupo Lufthansa (Lufthansa, Austrian Airlines, Brussels Airlines e Swiss). Outras compañías, como Qantas, prevén incorporarse proximamente.
Google tamén anunciou acordos con fabricantes de equipaxe como Samsonite para integrar a tecnoloxía Find Hub directamente nas maletas. Deste xeito, algúns modelos poderán conectarse automaticamente á rede de localización de Android sen necesidade de accesorios adicionais.
Entre as novidades tamén temos que Google Play incorporará proximamente un sistema de vídeos curtos que permitirá descubrir novas apps mentres se percorre un feed de contidos breves. Estes clips mostrarán o funcionamento das aplicacións en diferentes categorías, como saúde, fotografía, compras ou webtoons, co obxectivo de facilitar aos usuarios unha visión rápida antes de instalalas.
A actualización tamén introduce novas opcións de personalización nas chamadas mediante as chamadas Calling Cards. Os usuarios poderán crear unha tarxeta visual para as súas chamadas entrantes, escollendo fotografía, tipografía e cor para que os seus contactos vexan unha identificación máis personalizada. Esta tarxeta poderá compartirse con todos os contactos ou só con aqueles gardados na axenda.
Finalmente, o teclado Gboard amplía as combinacións de Emoji Kitchen, permitindo mesturar diferentes emojis para crear adhesivos personalizados que poden compartirse nas conversas.