As TIC farán posible unha Xustiza máis eficaz
mércores, 19 de maio do 2010
Impulsar o uso das TIC en tódolos campos da
administración é unha das prioridades que a meirande parte dos gobernos da
actualidade (uns máis e outros menos) teñen entre mans dende os últimos anos.
E é que o uso das novas tecnoloxías facilita
en gran medida o traballo diario do persoal da administración en calquera dos
seus eidos, ao tempo que aforra en tempo e custes e mellora a comunicación coa
cidadanía.
Se cadra a xustiza é unha das áreas que máis
se pode beneficiar das vantaxes das Tecnoloxías da Información e a Comunicación
(TIC) e de feito, o 85 por cento da cidadanía do noso país considera “clave” a implantación das mesmas “para incrementar a eficacia da
Administración da Xustiza”.
Segundo o informe Las TIC en la
Justicia del futuro, que foi presentado onte en
Santiago polo conselleiro de Presidencia, Administracións Públicas e Xustiza da
Xunta de Galicia, Alfonso Rueda, e o director territorial de Telefónica en
Galicia e Asturias, Ignacio Aller, “é
posible concebir unha nova Xustiza sen perder a rigurosidade e as garantías á
cidadanía, obtendo toda a eficiencia que as TIC outorgan aos sectores que as
usan dunha maneira intelixente”.
Para a realización deste informe traballaron conxuntamente un equipo
multidisciplinar formado por máis de 50
expertos e nel faise referencia ao Primeiro Plan de Sistemas e Tecnoloxías da
Información da Administración da Xustiza en Galicia, onde se establecen as
liñas de actuación dos vindeiros anos, que permitirán avanzar “cara un novo modelo máis áxil e sostible no
tempo”.
Asemade, este Primeiro Plan contempla a actualización dos sistemas de
información, o despegue de infraestruturas e medios tecnolóxicos, así como a
dotación dos recursos humanos para levar a cabo estas actuacións.
O obxectivo é realizar unha serie de cambios técnicos, organizativos e
administrativos encamiñados cara un modelo en Rede da Administración de
Xustiza, que permita, entre outras cousas, incrementar a eficacia do servizo.
A implantación das TIC, segundo sinala o informe, ofrece unha grande
oportunidade para responder á petición dunha Xustiza máis accesible, próxima e
transparente, que ofreza novas canles de acceso á información.
Por outra banda, mellora a relación coa cidadanía, prestando un servizo
de maior calidade capaz de garantir con rapidez e eficacia os dereitos
legalmente recoñecidos.
En resumidas contas, o obxectivo da implantación das TIC é lograr un
modelo de Xustiza en Rede: un sistema integral e intercomunicado entre toda a
Administración de Xustiza que garanta a interconexión telemática entre os
distintos axentes involucrados.