As áreas de descanso intelixente da Deputación chegan a Sanxenxo, O Grove, Cambados e Caldas
martes, 10 de xaneiro do 2023
A
Deputación de Pontevedra arrincou 2023 estendendo o radio de acción,
cara a máis concellos, das súas iniciativas de transformación
comercial Commerce Inside e Da túa man, que
habilitan contornas de descanso intelixentes para potenciar os
establecementos de proximidade, entre ouros recursos. En
concreto, a cidadanía de Sanxenxo, O Grove, Cambados e Caldas de
Reis xa pode desfrutar das súas novas zonas de lecer verdes, que
entregou a deputada provincial Noemí Outeda aos respectivos
gobernos.
En
total, ao longo dos últimos meses instaláronse estas áreas de
descanso en 20 concellos da provincia ao abeiro do proxecto Da túa
man (dirixido a
municipios para o apoio a mercados, zonas urbanas comerciais,
comercio non sedentario e canles curtas de comercialización) e da
iniciativa Commerce Inside (encamiñada a concellos
turísticos).
Os
proxectos, que están financiados ao 70% con Fondos Next Generation
EU e ao 30% pola Deputación e os concellos, buscan, en palabras da
entidade provincial, “favorecer o comercio polo miúdo e axudarlle
a abordar os retos dixitais aos que se enfrontan na actualidade os
establecementos de proximidade”.
Os
concellos beneficiarios son Baiona, Bueu, Tui, Soutomaior, Caldas de
Reis, Nigrán, Sanxenxo, Cambados e O Grove, a través de Commerce
Inside, e os de Moaña, A Cañiza, Gondomar, Meaño, Silleda,
Ribadumia, Poio, Ponte Caldelas, O Rosal, Salceda de Caselas e
Tomiño, no caso do proxecto Da túa man. Todas eles contan xa
con zonas de descanso en diferentes localizacións dos municipios,
que serán entregadas para a xestión municipal nos vindeiros días.
Na gran maioría dos casos, están dotadas con cargadores solares,
puntos de recarga para teléfonos e dispositivos dixitais, asentos,
iluminación e xardineiras, mentres que noutros tan só contarán con
xardineiras.
Por
outra banda, unha ampla porcentaxe destas novas áreas verdes de
descanso está dotada con paneis informativos luminosos de baixo
consumo que mostran toda a información precisa sobre a localización
da zona comercial e dos comercios existentes na mesma, impulsando
desta maneira a comunicación dos espazos comerciais destes 20
municipios e dotándoos dunha imaxe personalizada, para
caracterizalos así como un espazo único e homoxéneo. Toda a
información dispoñíbel pode consultarse a través dun código QR e
cárganse con enerxía solar.