As canles de WhatsApp inician o seu lanzamento global

En xuño anunciaron que estaban a preparar a chegada das canles a WhatsApp, funcionalidade que levan semanas probando con éxito en 10 países, de aí que hoxe anuncien que as canles pasarán a estar dispoñibles en máis de 150 países, aspirando a converterse nunha forma privada para recibir actualizacións relevantes directamente en WhatsApp, e coidando a privacidade, xa que os creadores das canles non terán acceso aos números telefónicos dos subscritores, nin tampouco o resto dos usuarios sabe das subscricións de cadaquén.
Este novo servizo de difusión agora inicia o seu lanzamento global, aproveitando a ocasión para mellorar o seu directorio de canles (facendo máis doado atopar canles novas, populares ou moi activas, e podendo filtralas por país), permite reaccionar ás publicacións (coñecerase o número de cada reacción, pero non quen a fai), os administradores poderán editar as súas actualizacións durante un prazo máximo de 30 días (prazo tras o que borraranse dos servidores de WhatsApp) e cando se reenvíe unha actualización a outro usuario incluirase unha ligazón á canle para que as persoas poidan obter máis información.
Aseguran que isto só é o comezo dunha funcionalidade que revolucionará o tipo de uso que pode facerse de WhatsApp, e está previsto que nos vindeiros meses calquera usuario poida crear unha canle de seu. Como mostra, o propio WhatsApp xa ten unha canle para dar conta das súas novidades.
No momento de publicar estas liñas xa hai usuarios galegos podendo acceder ás canles de WhatsApp.