ChatGPT avanza no ámbito da saúde

OpenAI anunciou o lanzamento de ChatGPT Health, unha nova experiencia deseñada para integrar de maneira segura a información médica persoal coa intelixencia artificial de ChatGPT, co obxectivo de ofrecer máis información, confianza e preparación ás persoas á hora de coidar da súa saúde.
A saúde é xa un dos ámbitos máis recorrentes no uso de ChatGPT. Cada semana, centos de millóns de persoas formulan preguntas relacionadas co benestar e o coidado persoal. ChatGPT Health combina os controis de privacidade, seguridade e xestión de datos con proteccións adicionais específicas para o ámbito sanitario, como o cifrado avanzado e o illamento das conversas, que garanten que a información sensible permaneza privada e compartimentada. A ferramenta permite conectar de forma segura a historia clínica e aplicacións de benestar, de xeito que as respostas se baseen na información sanitaria propia de cada usuario e resulten máis relevantes e útiles. O sistema foi desenvolvido en colaboración con profesionais médicos e está pensado para apoiar a implicación activa das persoas no coidado da súa saúde, sen substituír en ningún caso aos profesionais sanitarios.
O servizo permite conectar de maneira segura a historia clínica electrónica e aplicacións de benestar como Apple Health, Function ou MyFitnessPal. Grazas a isto, os usuarios poden recibir axuda para interpretar resultados de probas recentes, preparar citas médicas, obter recomendacións sobre dieta e exercicio ou comprender mellor as vantaxes e inconvenientes de distintas opcións de seguro segundo os seus hábitos de uso do sistema sanitario.
ChatGPT Health non se emprega para o diagnóstico nin para o tratamento médico. A súa función é resolver dúbidas habituais, identificar patróns ao longo do tempo e facilitar unha maior claridade e confianza nas conversas con profesionais da saúde.
O lanzamento comeza cun grupo reducido de usuarios iniciais, co obxectivo de recoller aprendizaxes e mellorar a experiencia. OpenAI prevé ampliar progresivamente o acceso e facer que ChatGPT Health estea dispoñible para todos os usuarios na web e en iOS nas vindeiras semanas, a través dun sistema de listaxe de agarda. As integracións con historias clínicas electrónicas e algunhas aplicacións están, polo de agora, dispoñibles só nos Estados Unidos, e a conexión con Apple Health require iOS.