ChatGPT inicia a inserción de anuncios

OpenAI iniciou probas de publicidade en ChatGPT nos Estados Unidos, dirixidas unicamente a usuarios adultos con contas dos plans de balde e Go. Segundo explicou a compañía, os plans Plus, Pro, Business, Enterprise e Education permanecerán libres de anuncios, igual que as contas de menores de 18 anos.
A empresa subliña que esta publicidade non inflúe nas respostas que ofrece ChatGPT nin dá acceso aos anunciantes ás conversas, ao historial de chats ou a datos persoais dos usuarios. O obxectivo da iniciativa é financiar o mantemento e a mellora do servizo gratuíto e de baixo custo, garantindo ao mesmo tempo a confianza dos usuarios nunha ferramenta que empregan para tarefas persoais, profesionais e educativas.
OpenAI asegura que os anuncios estarán sempre claramente identificados como contido patrocinado e separados visualmente das respostas xeradas polo sistema. Durante esta fase de probas, a selección dos anuncios basearase na temática da conversa, en interaccións previas do usuario coa plataforma e con publicidade anterior, así como na relevancia entre os distintos anunciantes dispoñibles.
Dende a compañía de Sam Altman recalcan que os anunciantes só reciben datos agregados sobre o rendemento dos seus anuncios, como visualizacións ou clics, sen acceso individualizado á información dos usuarios. Ademais, queda excluída a inserción de publicidade en contidos sensibles ou regulados, como saúde, saúde mental ou política.
Os usuarios disporán de opcións de control sobre a publicidade, incluíndo a posibilidade de descartar anuncios, enviar valoracións, coñecer por que se lles mostra un determinado contido patrocinado, eliminar datos publicitarios cun só toque ou xestionar a personalización en calquera momento. Tamén se ofrece a alternativa de evitar anuncios no plan de balde a cambio dunha redución no número diario de mensaxes dispoñibles, ou ben optar por un plan de subscrición superior.
OpenAI indica que esta fase ten un carácter experimental e que o foco está en recoller aprendizaxes e escoitar o feedback antes de ampliar o programa. A medio prazo, a compañía prevé desenvolver novos formatos e modelos de compra publicitaria, mantendo como principios inalterables a independencia das respostas, a privacidade das conversas e o control do usuario sobre a súa experiencia.