Comeza a Semana da Ciencia con dúas mostras interactivas sobre o cerebro en Pontedeume e Carballiño

xoves, 2 de novembro do 2006 Fernando Sarasketa

Este xoves 2 comeza oficialmente en Galiza a Semana da Ciencia, a celebración europea do espírito investigador. Esta semana 2006, que consiste en liñas xerais nun variado programa de actividades encamiñadas a estreitar o contacto entre a comunidade científica e o resto da sociedade (abrindo os laboratorios, organizando exposicións e visitas guiadas, etc), dedícase en boa medida á neurociencia. O motivo? A celebración do centenario da concesión do Premio Nobel a Santiago Ramón y Cajal. Deste xeito, non é casualidade que a Semana comece este xoves coa apertura das mostras O mundo na túa cabeza: a máquina de crear realidades (no Convento dos Agostiños de Pontedeume a partir das 12.30 horas) e O mundo na túa cabeza: que saben os e como nolo contaron? (no Centro Comarcal de Carballiño, a partir das 19.30).
A Semana da Ciencia 2006 está coordinada pola Consellería de Innovación e nela participarán en labores de organización até 19 entidades galegas, entre museos, universidades, centros de investigación e tecnolóxicos, asociacións e fundacións.
Ademais, serán un total de 101 actividades de índole moi variada, e que irán das exposicións ás visitas guiadas, sen deixar de lado actividades lúdico-formativas como ciclos de cine, teatro ou cafés científicos, tratando os organizadores en todo momento de quitarlle ferro á investigación científica e amosando a súa importancia para o benestar da sociedade.
Ademais, gran parte das actividades están deseñadas para captar un público novo, xa que deles e das súas vocacións depende –a fin de contas– o futuro da ciencia en Galiza e mesmo o desenvolvemento desta. Cómpre sinalar que a Dirección Xeral de I+D contará co apoio da Fundación Española e a Tecnoloxía (FECYT) do Ministerio de Educación e Ciencia.
O programa de actividades desenvolverase en toda Galiza nos meses de novembro e decembro, sobre todo do 6 ó 19, contando Innovación cun orzamento de 737.454 euros. Respecto ós temas que se tratarán, son tan variados como se poida imaxinar: astronomía, arqueoloxía, física, química, comunicación, medicina, dereito, matemáticas, etc.

PUBLICIDADE