Convocada a oitava edición do certame de podcast O Vello dos Contos

O IES Plurilingüe Rosalía de Castro (Santiago de Compostela), Arraianos Producións e a Secretaría Xeral da Lingua convocaron a VIII edición dos Premios Internacionais de Podcast Xosé Mosquera Pérez, O Vello dos Contos, cuxo obxectivo é promover a lingua e a cultura galega e portuguesa entre a mocidade mediante a elaboración de gravacións sonoras online e orixinais relacionadas coas nosas escritoras e escritores.
Poderá concorrer a estes premios o alumnado dos centros de ensino de educación primaria e secundaria, incluído para adultos, e das universidades de Galicia e Portugal.
Presentaranse gravacións sonoras dixitais orixinais e inéditas relacionadas coa figura de Xosé Mosquera Pérez, O Vello dos Contos, ou cos inicios da radio en Galicia, así como outros relacionados con calquera das materias dos plans de estudos dos diferentes niveis educativos aprobados pola Xunta de Galicia.
O prazo de presentación de solicitudes de inscricións finaliza o 13 de febreiro de 2026 e o de presentación e envio de traballos remata o 1 de maio de 2026.
Premios
-Premio ao mellor traballo de primaria de Galicia e dos centros que imparten ensinanzas de réxime xeral, do mesmo nivel, fóra da Comunidade Autónoma.
-Premio ao mellor traballo de secundaria de Galicia e doutros centros de ensino non universitario e dos que imparten ensinanzas de réxime xeral, do mesmo nivel, cursados fóra da Comunidade Autónoma.
-Premio ao mellor traballo de centros de ensino para adultos.
-Premio ao mellor traballo realizado por alumnado universitario de calquera titulación.
-Premio ao mellor proxecto radiofónico.