En novembro teremos Resident Evil 6 para Xbox 360 e PlayStation 3

xoves, 19 de xaneiro do 2012 Marcus Fernández

Hoxe estreouse na Nintendo eShop a demo de Resident Evil: Revelations para a 3DS, e coincidindo con tal grato momento para os seareiros da saga creada por Shinji Mikami, dende Capcom sorpréndennos cun xeneroso trailer de máis de 3 minutos no que anuncian o desenvolvemento do xogo Resident Evil 6 para Xbox 360 e PlayStation, título que xuntará como protagonistas a Leon S. Kennedy e Chris Redfield (xuntos nun xogo por primeira vez) e que ten previsto o seu lanzamento para o vindeiro 20 de novembro. Máis adiante tamén haberá versión para PC.
O xogo está ambientado 10 anos despois dos sucesos de Raccoon City, nun momento no que o presidente dos EE.UU. decide facer pública a verdade sobre o que parece un novo brote de actividade bioterrorista, do que tamén padece as consecuencias. Leon S. Kennedy partirá desta situación, trama que enlazará coa de Chris Redfield, que chegará a China debido á mesma ameaza bioterrorista, deixando claro que ningún país do mundo está libre desta ameaza. Ao igual que acontece co xogo para 3DS que verá a luz nos vindeiros días, Resident Evil 6 parece querer conservar a mecánica de acción das últimas entregas á vez que recupera parte da esencia survival os primeiros títulos da saga.