Estudantes do CIFP Leixa lanzan un sitio web para homenaxear a Begoña Caamaño: BegoZine

O alumnado do CIFP Leixa de Ferrol vén de publicar un pequeno sitio web con recursos interactivos arredor da vida e obra de Begoña Caamaño, a autora homenaxeada no Día das Letras Galegas deste 2026. O recurso, que se pode visitar dende hai uns días na web do CIPF Leixa, foi elaborado integramente por estudantes do ciclo formativo.
O BegoZine inspírase nos fanzines impresos (publicacións independentes de temática e deseño libre, a miúdo colaborativas, e adoito non profesionais), mais dálle unha volta levando o concepto ao mundo dixital e facelo interactivo. Cada estudante deseñou, a título individual ou en grupo, algunha pequena experiencia virtual arredor do mundo de Begoña Caamaño e plasmouna dentro desta escolma web, un proxecto que segundo informan dende o CIFP “naceu de forma colaborativa e moi libre, e inclúe recursos do máis variado: vídeos, videoxogos, un conto infantil, pasatempos, recursos para imprimir e mesmo un mapa cunha ruta pola parroquia ferrolá de Esmelle, lugar onde transcorre unha das novelas da autora, onde o público pode colaborar engadindo imaxes propias”.
Este proxecto foi realizado polo alumnado de 2º curso do Ciclo Superior de Deseño e edición de publicacións impresas e multimedia, que non só tivo que investigar sobre a figura de Begoña Caamaño, senón que tamén se enfrontou á complexidade de artellar e coordinar un proxecto multimedia realizado por máis dunha ducia de persoas.