Eva Riveiro e Gustavo López, gañadores do I Concurso Literario Infantil sobre Protección de Datos
mércores, 28 de xuño do 2017
O
Colexio Profesional de Enxeñaría en Informática de Galicia (CPEIG)
e a Consellería de Cultura, Educación e Ordenación Universitaria
veñen de fallar a primeira edición do Concurso Literario Infantil
sobre Protección de Datos, un certame encamiñado a fomentar e
divulgar entre a nenez e a adolescencia as vantaxes de efectuarmos
navegacións seguras e salvagardar e respectar a información e as
comunicacións, tanto a propia coma a dos demais. A iniciativa
atinxiu a rapazas e rapaces de 1º a 4º de ESO, ambos cursos
inclusive, estudantes en centros escolares sostidos con fondos
públicos de Galicia.
Na
categoría 1º-2º ESO a gañadora foi Eva Riveiro Formoso, de 2º da
ESO, grazas ao seu traballo Oinc. Eva estuda no Colexio
Compañía de María, Santiago de Compostela.
Na
categoría 3º-4º ESO o gañador foi Gustavo López Leyenda (4ª
ESO) co traballo PISOTE. Gustavo estuda no Colexio CPI de Cova
Terreña, Baiona, Pontevedra.
Segundo
informa o CPEIG, o centro educativo con meirande taxa de
participación no certame foi o Colexio Compañía de María,
Santiago de Compostela.
En
palabras da entidade profesional, o obxectivo final do concurso é
“contribuír a que a sociedade galega tome conciencia da necesidade
de incorporarse á cultura da protección de datos, nomeadamente os
menores de idade”. Tanto a Xunta coma o CPEIG consideran que
“cómpre promover o coñecemento entre a cidadanía sobre cales son
os seus dereitos e responsabilidades en materia de protección de
datos”.
Requirimentos
Ao
abeiro dos requirimentos da convocatoria, amais de cursar os estudos
xa sinalados, os xéneros literarios cos que se podía participar
foron o artigo periodístico, a exposición divulgativa (entrada de
blogue ou artigo de divulgación) e conto ou relato curto. O
referente sinalado polas entidades convocantes foi o Protocolo de
Protección de Datos da Consellería de Cultura, Educación e
Ordenación Universitaria (educonvives.gal)
e as publicacións da Axencia Española de Protección de Datos.
Os
rapaces gañadores recibiron unha tableta e os seus centros
educativos, un kit de robótica para a súa aula. Asemade, o Colexio
Compañía de María de Santiago de Compostela mereceu un
recoñecemento como centro cunha maior participación no certame.