Fan unha copia de seguridade de Spotify

Un proxecto de preservación de contido en soporte dixital, Anna’s Archive, que distribúe conxuntos de datos a través da rede de intercambio de ficheiros BitTorrent, sorprendeu esta fin de semana anunciando que conseguiron realizar unha copia de seguridade de Spotify.
Aínda que o proxecto normalmente se orientaba a contidos de texto, tras atopar un xeito de extraer contidos de Spotify a grande escala decidiron realizar unha copia o máis completa posible, para que poida servir como un arquivo de preservación musical.
A colección que crearon contén preto do 99,9 % dos metadatos dos 256 millóns de pistas musicais que estiman que almacena Spotify, descargando os ficheiros musicais máis populares (que representan o 99,6 % das escoitas) o que supón 86 millóns de ficheiros musicais en formato OGG Vorbis a 160 Kbps (nos ficheiros máis populares, limitando a 75 Kbps a calidade dos ficheiros con menos reproducións) que ocupan preto de 300 TB. Un dos argumentos esgrimidos para mon facer unha copia máis exhaustiva con calidade completa é que unha parte moi significativa da música que carece de popularidade está xerada mediante IA.
Só os metadatos extraídos de Spotify (que xa teñen un grande valor de cara á preservación da información musical) xa ocupan 199,9 GB, estando bastante replicados na Internet (ao que en breve seguirán os ficheiros musicais e incluso as portadas dos álbums), polo que podemos estar ante unha iniciativa que acade unha escala semellante á de Z-library, o que probablemente se traduza nunha resposta contundente por parte da industria musical, que pode ver a preservación musical como piratería.