Galicia Nomeada será unha das grandes protagonistas da VI Xornada da Comisión de Nomes Xeográficos

A Cidade da Cultura acollerá o 21 de setembro a VI Xornada da Comisión Especializada de Nomes Xeográficos, organismo do Instituto Xeográfico Nacional no que participa a Real Academia Galega (RAG) xunto a outras institucións de todo o Estado. O encontro reunirá por primeira vez en Galicia algúns dos maiores expertos en toponimia e cartografía de España. A RAG e a Xunta colaboran na organización da cita, que se centrará na estreita relación existente entre os nomes xeográficos e mundo dixital. A escolla da nosa terra para ser a anfitrioa desta xuntanza de especialistas en cartografía e toponimia débese en parte á experiencia do portal Galicia Nomeada, a plataforma para a salvagarda do patrimonio inmaterial toponímico posto en marcha pola RAG e a Xunta (Consellería de Cultura, Secretaría Xeral de Política Lingüística), sendo xa un referente na colaboración entre institucións cunha base integramente dixital.
Como lembraremos, desde a súa estrea a finais de 2019, Galicia Nomeada aglutina nun mesmo espazo máis de medio millón de topónimos e microtopónimos xeolocalizados e dispoñíbeis para consulta, 60.000 deles achegados polas máis de 3.100 persoas colaboradoras inscritas na actualidade.
Galicia Nomeada será unha das protagonistas do programa, que contará tamén con voces expertas das diferentes comunidades autónomas que forman parte da Comisión Especializada de Nomes Xeográficos para achegaren información sobre os traballos que ligan o mundo dixital coa toponimia nos seus ámbitos de actuación.
O público que desexe asistir pode inscribirse na ligazón específica habilitada até o 11 de setembro.
O programa incluirá, entre outros relatorios, unha intervención sobre Galicia Nomeada a cargo do coordinador da unidade técnica de toponimia do Seminario de Onomástica da Real Academia Galega, Vicente Feijoo, que representa a RAG na Comisión Especializada de Nomes Xeográficos xunto á académica correspondente Luz Méndez; haberá distintas contribucións sobre a elaboración e a actualización dos nomenclátores xeográficos de Andalucía, Illes Balears, Asturias, o Instituto Xeográfico Nacional e o Instituto Nacional de Estatística a cargo de María Teresa Garrido, Eulàlia Fons Carbonell, Juncal Mónica García Velasco, Angélica Castaño Suárez, María Natalia Fojo Díaz, respectivamente; Maite Mollà Villaplana presentará un traballo sobre a elaboración da segunda edición das directrices toponímicas de uso internacional para editores de mapas, cartas náuticas e outras publicacións; e Marcos F. Pavo López falará sobre a toponimia en mapas antigos como ferramenta para trazar a súa liñaxe, deténdose na transmisión do topónimo "Elcano" na cartografía dos séculos XVI e XVII.
A Comisión Especializada de Nomes Xeográficos está integrada no Consello Superior Xeográfico e ten como misión impulsar a normalización dos nomes xeográficos no Estado, en coordinación cos diferentes organismos competentes do Estado e das comunidades autónomas. A comisión está formada por representantes de autoridades en nomes xeográficos da Administración xeral do Estado e das comunidades, expertos de universidades e das academias das linguas e doutras institucións relacionadas coa toponimia.<br