Google News volve a España e continúa a marxinar o galego

A lexislación española levou a que en 2014 botase o peche Google News en España, xa que a empresa de Mountain View non estaba disposta a pagar unha compensación aos medios de comunicación por divulgar os seus contidos co seu consentimento e baixo o seu control.
O peche do servizo levou a que moitos medios de comunicación perdesen bastante tráfico, polo que decidiron presionar para que o Goberno modificase a lexislación para poder reverter a situación, xa que cobrar aos agregadores de novas na web confirmouse como algo inviable ou, como mínimo, moi pouco rendible.
Finalmente aprobouse o Real Decreto-lei 24/2021 de 2 de novembro, que traspón directivas europeas relativas aos dereitos de autor e dereitos afíns aplicables a determinadas transmisións en liña, o que daba luz verde á volta de Google Noticias, e, finalmente, coincidindo co 20 aniversario mundial do servizo, Google News volve a España.
Neste momento podemos acceder á páxina web de Google News, e en breve poderase tamén acceder ao servizo a través das súas aplicacións móbiles. Deste xeito preténdese que os lectores teñan máis doado localizar novas de medios fiables, contribuíndo así á loita contra a desinformación.
Google News tamén pode resultar útil para a localización de novas locais, aínda que en tal caso cómpre salientar que o servizo en España só acepta medios en español, ou sexa, que os medios en éuscaro, catalán e galego permanecer marxinados do espazo de novas de Google, discriminación que prexudica claramente ás linguas minorizadas e restrinxe considerablemente a difusión de información de proximidade.