Google alugará películas a través de YouTube

YouTube, a popular web de vídeos de Internet propiedade de Google, vai comezar en breve a probar un novo servizo de aluguer de películas en Internet con cintas independentes do Festival de Cine Sundance.
Este servizo, que estará dispoñible para os internautas a partir do vindeiro mes de xuño, estará limitado inicialmente a cinco títulos de Sundance, así como a unha pequena colección de vídeos de socios e industrias da saúde e da educación, entre outras.
Nas vindeiras semanas, segundo The New York Times, YouTube convidará a outros socios independentes a participar neste mesmo servizo de aluguer, que ofrece unha nova opción ademais do modelo respaldado por publicidade que YouTube emprega na actualidade para ofrecer vídeos no seu site.
O portavoz da compañía, Chris Dale, afirma que “o programa podería ampliarse potencialmente ata incluir películas de recente lanzamento da maioría dos estudos de Hollywood”, porén non afirmou ter falado cos estudos sobre tema nin para cando pode estar listo este servizo extra.
Na actualidade, esta web de vídeos en liña ofrece películas antigas e programas de televisión, así como outros contidos de vídeo de socios como MGM, Worlwide Digital Media e Walt Disney; sen contar cos millóns de vídeos caseiros dos usuarios, que ao igual que o resto de contidos están dispoñibles de balde grazas a un sistema apoiado por publicidade.
Aínda que son poucos os detalles que se coñecen sobre este novo servizo, Dale adiantou que os cineastas que participen no novo programa de aluguer en liña, “poderían cobrarlle aos usuarios entre 99 centavos e 19,99 dólares polas películas, que poderían estar dispoñibles durante un periodo de 24 horas ata un máximo de 90 días”.