Ineo e a Universidade de Vigo sentan os alicerces de futuras colaboracións arredor da innovación e o coñecemento

A asociación Ineo e a Universidade de Vigo traballarán de xeito conxunto a prol das mellores condicións posibles para o desenvolvemento, na nosa terra, da innovación e a transferencia de coñecemento tecnolóxico. Así nolo fixeron saber este xoves os principais responsables de ámbalas entidades, o reitor Salustiano Mato e o presidente de Ineo, Jorge Cebreiros. A información foi dada no transcurso da última Sobremesa de Ineo (xeira de xuntanzas que dan acubillo a persoeiros galegos de interese para o sector TIC), na que participou case unha vintena de profesionais.
A cita, que contou coa presenza, tamén, do director do Campus do Mar, Emilio Fernández Suárez, foi a materialización dunha demanda concreta: a das empresas socias de Ineo, para as que resultaba de gran interese compartir experiencias co Campus do Mar e a súa principal impulsora, a Universidade de Vigo. Asemade, buscábase coñecer de primeira man a vertente TIC das devanditas entidades, subliñándose eidos de traballo en común (universidade-empresas) de gran potencial.
Para Salustiano Mato, estamos ante unha boa oportunidade para comezar a avaliar a excelencia das universidades en base non só ao coñecemento que se xera no seu seo, senón da transferencia que se fai dese coñecemento cara á sociedade en xeral a través do tecido empresarial. Ao fío disto, o director do Campus do Mar tirou proveito da ocasión para explicar polo miúdo os obxectivos e liñas estratéxicas do dito proxecto académico e investigador, salientando a estreita ligazón que se busca, en base ao Campus, entre o mundo investigador e máis o eido produtivo.
As empresas presentes na sobremesa, pola súa parte, parabenizaron a orientación do Campus do Mar (unha liña de traballo que se está a trasladar a outras áreas diferentes da Universidade), e amosaron o seu interese por coordinarse e participar no escenario de colaboración TIC-Mar que se achega. Jorge Cebreiros, neste senso, díxolles aos principais responsables da Universidade e máis do Campus que “poden contar con Ineo para o que precisen”.
Lembrar que a vindeira Sobremesa de Ineo celebrarase o vindeiro 10 de maio en Santiago, e terá como persoeiros convidados aos parlamentarios galegos.