Instagram permitirá personalizar as recomendacións nos Reels

Instagram presentou hoxe unha nova forma de controlar a experiencia dentro da plataforma, que se estrea na lapela de Reels e que emprega intelixencia artificial para adaptar as recomendacións aos intereses cambiantes dos usuarios. A compañía explica que o obxectivo é ofrecer ferramentas máis significativas para personalizar o que se mostra na aplicación, comezando polos vídeos curtos.
A principal novidade é a función O teu algoritmo, accesible premendo unha icona situada na parte superior dereita da pantalla (dúas liñas con corazóns). Unha vez aberta, permite consultar os temas que a plataforma considera máis relevantes para cada usuario, modificar as preferencias e facer que as recomendacións se axusten en tempo real.
Os usuarios poden ver un resumo cos seus principais intereses, introducir manualmente temas dos que desexen recibir máis ou menos contido e incluso compartir esta lista nas súas historias para amosar aos seguidores aquilo que máis lles gusta. A tecnoloxía de IA permitirá que os resultados se adapten de inmediato ás novas eleccións.
Aseguran que se trata dun primeiro paso cara a un maior control sobre o funcionamento interno das recomendacións. A funcionalidade comeza a activarse desde hoxe nos Estados Unidos e despregarase globalmente en inglés nas vindeiras semanas. Instagram advirte de que esta é aínda unha fase inicial e comprométese a seguir perfeccionando a experiencia antes de levala a outras áreas da aplicación.