Linknovate e Situm obteñen o Premio Iniciativa Emprendedora do CPEIG

Os impulsores de Linknovate nunha imaxe publicada en El Mundo, Manuel Noya e José López Veiga

O Colexio Profesional de Enxeñaría en Informática de Galicia, CPEIG, vén dar a coñecer as identidades das dúas empresas galegas que este ano recibirán, ex aequo, o Premio Iniciativa Emprendedora. Trátase de Linknovate e Situm, dúas compañías tecnolóxicas da nosa terra que, en palabras do Colexio, amosaron dende o primeiro intre da súa andaina “unha marcada dimensión internacional”. O galardón compartido será entregado no marco da Noite da Enxeñaría en Informática de Galicia, que organiza en Santiago o CPEIG, o vindeiro 16 de xuño, e que coincide, para quen non o saiba, coas celebracións dos dez anos de traxectoria da dita entidade profesional.
Linknovate Science S.L. nace no ano 2012 en Palo Alto, na aceleradora de startups da Universidade de Stanford, co obxectivo de “axudar ás empresas a identificar tecnoloxías e mercados emerxentes, e os seus axentes clave”. En concreto, Linknovate realiza recuperación de información sobre bibliotecas de revistas científicas, patentes e múltiples fontes de datos para facilitarlles ás empresas intelixencia “na procura de contribucións e socios que lles poidan interesar para os seus proxectos”.
Os seus impulsores fornecen intelixencia competitiva como servizo, mediante o desenvolvemento de ferramentas de software, como o motor de busca para innovación, Linknovate.com e a elaboración de informes personalizados que inclúen a opinión directa de expertos e analistas adicados en exclusiva ao proxecto, curando información, alén dos algoritmos de Machine Learning e NLP, que axudan a dixerir grandes cantidades de datos.
A súa tecnoloxía céntrase na analítica de datos e visualizacións e información directa de expertos na materia (primary research).
O modelo de negocio polo que aposta Linknovate é, en palabras do CPEIG, “realmente accesible”, con subscricións freemium (sen custo de alta) e informes personalizados a demanda.
Aínda que Linknovate é unha compañía TIC, o seu negocio é transversal. Serven a clientes en múltiples industrias, como en enerxía (Repsol), motor (Faurecia, BMW), electrónica de consumo (Jabil Inc.), sanidade (ACIS-Sergas) ou biotecnoloxía (IBA-Group).
Situm
Pola súa banda, Situm Technologies S.L. é unha spin-off do Centro de Tecnoloxía Avanzada da Universidade de Santiago de Compostela (CITIUS), fundada en 2013. Segundo explica o CPEIG, “desenvolveu unha tecnoloxía de posicionamento en interiores única tras máis de 7 anos de investigación aplicada en robótica móbil e intelixencia artificial”. Situm, engade o Colexio, “é sinónimo de mapas de interiores, localización e navegación coa máxima precisión para os usuario móbiles, a infraestrutura mínima e o menor tempo de implementación”.
Os seus fundadores, doutores en enxeñaría, uniron os seus esforzos para lograr os mellores emprazamento e localización en interiores de alta precisión para smartphones, sen a necesidade de instalar ou investir en hardware adicional.
Premios Linknovate
· 2013. Seleccionados por StartX para o programa acelerador de empresas da Universidade de Stanford en Palo Alto.
· 2014. Hola Cloud (ICT Cloud Computing). H2020 grant, concedido pola Comisión Europea.
· 2015. Finodex (FiWare, aceleradora europea en Open Data). Concedido pola Comisión Europea.
· 2016. Seleccionados por Microsoft para o programa acelerador de empresas de Microsoft en Berlín.
· 2016. Recap (TIC Cloud Computing). H2020 grant, concedido pola Comisión Europea.
· 2016. SME Instrument fase 1. H2020 grant, concedido pola Comisión Europea.

Boa parte do equipo de Situm Technologies nunha imaxe recente

Premios Situm
· Premios Everis 2016. Accésit.
· Gañadora do IMPACT’s Third Open Call (2015) e IMPACT Extensión 2016.
· Onda Emprende. Onda Cero 2015.
· Open Future 2015. Primeiro premio.
· Mellor spin-off de base tecnolóxica USC 2015.
· Emprendedor XXI Galicia. Primeiro premio.
· Premio Elevator Pitch Singularity University 2015.
· Top 5 Startups máis prometedoras en Digital Solutions for Mass Markets. South Summit Awards 2015.
· Galicia Emprende 2015. Gañador da categoría internacional.
· Galicia Spin-Off 2015, categoría Mellor Idea Emerxente.
· YUZZ 2014. Primeiro premio.
· Smart Ideas 2014 no Proxecto Smart City. Concello da Coruña.