Lorenzana reivindica o potencial de Televés para integrarse na Estratexia de Seguridade, Defensa e Aerospazo

A conselleira de Economía e Industria, María Jesús Lorenzana, destacou este martes 2 de decembro as capacidades tecnolóxicas de Televés, a quen convidou a formar parte da Estratexia de Seguridade, Defensa e Aerospazo da Xunta, que busca promover novos proxectos e investimentos industriais nestes sectores.
Lorenzana reuniuse co conselleiro delegado da compañía especializada no deseño, fabricación e comercialización de equipos de telecomunicacións, Gonzalo Redondo, dentro da rolda de contactos que vén mantendo con diferentes empresas para identificar os obxectivos de investimento da industria da defensa, a seguridade e o aerospazo en Galicia.
Coa estratexia deseñada pola Xunta para estes sectores, que vai contar cun investimento de 183 millóns de euros de aquí a 2030, o que se persegue é “impulsar o crecemento das empresas que conforman esta industria na comunidade, atraer cara a ela outras novas, e reforzar as capacidades tecnolóxicas e produtivas de Galicia neste eido”, lembrou a conselleira, recordando tamén que a previsión é publicar en 2026 a primeira convocatoria de licitación, dotada con 83 millóns de euros, para definir que empresas e centros tecnolóxicos van traballar en programas conxuntos de investimento coa Xunta de Galicia nos vindeiros cinco anos.
Polo de agora, dentro do diálogo estratéxico que se abriu coa industria, identificáronse 79 proxectos de investimento, dos que 40 deles están relacionados coa ampliación ou instalacións de novas cadeas de produción en Galicia.
Lorenzana fixo saber que a comezos do vindeiro ano publicaranse tamén dúas convocatorias de axudas que suman 8 millóns de euros para apoiar o posicionamento das empresas galegas como subministradoras de tecnoloxía de defensa e seguridade, e para o desenvolvemento e industrialización de produtos e sistemas baseados en tecnoloxías duais.