Máis dun cento de estudantes resolven retos de ciberseguridade na CITIC Cyber Competition
mércores, 23 de febreiro do 2022
O Centro de Investigación TIC (CITIC) da Universidade da
Coruña e atlanTTic da Universidade de Vigo acolleron a CITIC Cyber Competition – C3TF, unha competición
celebrada simultaneamente en ambos centros de investigación e de forma online,
que reuniu a máis de 100 estudantes para resolver retos de ciberseguridade. A
Cátedra R en Ciberseguridade e o MUNICS (Máster Inter-Universitario en
Ciberseguridade) colaboraron no evento.
O C3TF tivo a finalidade de promover o desenvolvemento das
habilidades en seguridade informática de estudantes de calquera nivel
educativo. Así, déronse cita estudantes de bacharelato, Formación Profesional,
Grao e Máster, organizados nun total de 33 equipos. Durante 4 horas,
enfrontáronse a 22 retos nos ámbitos da esteganografía, a criptografía,
forense, entre outras categorías.
A CITIC Cyber Competiton premiou aos tres equipos gañadores
con galardóns de 1000, 700 e 300 € cada un. O equipo que máis puntuación obtivo
foi XORprecha, composto por José Ángel Álvarez Sánchez, Álvaro Manso Porteiro,
Ismael Melchor Juan, Pedro Jose Navas Pérez e Esteban Segura Ripoll; o segundo
premio acadouno o equipo El sindicato del flag, formado por Manuel Orois
García, Olalla Rama García, Armando Nogueira Río e Gabriel Díaz Guimaraens; e o
terceiro galardón foi para quackbomb, equipo conformado por Ignacio Borregán
Naya, Daniel Feito Pin, Clara Barrios Hermida, Santiago Julio Iglesias Portela
e Pablo Longueira Failde.
O acto de apertura contou coa presenza do director do CITIC da Universidade da Coruña, Manuel F.
González Penedo; o director de atlanTTic da Universidade de Vigo, Martín Llamas
Nistal; o vicedecano de Recursos Informáticos da Facultade de Informática da
UDC, Carlos Fernández Lozano; e o director de R, Alfredo Ramos González. Todos
eles coincidiron na importancia da ciberseguridade en numerosos aspectos da
sociedade actual e na necesidade de apostar por actividades e eventos destas
características que fomenten o interese por esta área de coñecemento entre as
xeracións máis novas.
Os coordinadores do MUNICS na Universidade da Coruña e na
Universidade de Vigo, Francisco Javier Nóvoa Manuel e Ana Fernández Vilas,
respectivamente, interviñeron no acto de clausura para animar aos participantes
a decantarse por este programa de estudio especializado para continuar a súa
formación.