Mobify chega á Costa da Morte para facilitar a mobilidade turística

Fisterra conta xa cun servizo de vehículo compartido que busca cubrir unha das principais carencias do turismo en Galicia: a mobilidade en destinos rurais e costeiros. A empresa galega Mobify e o Hotel O Semáforo de Fisterra puxeron en marcha unha alianza que permite a turistas, peregrinos e veciños acceder a coches eléctricos mediante unha aplicación, nun modelo que xa está operativo e que rexistrou unha elevada demanda desde o primeiro día.
A iniciativa pretende dar resposta a un problema estrutural: a dificultade de desprazamento máis alá das grandes cidades. En zonas como a Costa da Morte, a oferta de transporte público é limitada, especialmente fóra da tempada alta, o que condiciona a experiencia dos visitantes. Segundo datos do sector, o 40 % do territorio galego carece de servizos regulares de transporte e o 65 % dos municipios teñen menos de 10.000 habitantes, factores que penalizan a competitividade turística.
O modelo de Mobify baséase nunha flota 100 % sustentable e nun sistema de pagamento por uso que elimina os custos fixos asociados á propiedade dun vehículo. Nun momento no que os carburantes están a disparar o seu prezo, Mobify decidiu manter as súas tarifas conxeladas, reforzando a súa proposta como alternativa económica e accesible.
A mobilidade converteuse nun factor clave para o desenvolvemento do turismo en Galicia, que en 2024 acadou cifras récord de visitantes e gasto medio. Porén, este crecemento contrasta coa falta de solucións flexibles para acceder a destinos de alto valor paisaxístico e cultural, como a Costa da Morte, as Rías Baixas ou a Ribeira Sacra.
Desde o Hotel O Semáforo de Fisterra subliñan que a demanda de opcións de transporte era constante entre os seus hóspedes, especialmente entre aqueles que chegan en transporte público ou completan o Camiño de Santiago. A incorporación do carsharing permite agora explorar a contorna con maior autonomía e comodidade.
O servizo facilita a recollida e devolución do vehículo no propio establecemento, simplificando os desprazamentos a enclaves próximos como o cabo Fisterra, a fervenza do Ézaro ou Muxía. Este modelo, ademais, optimiza o uso dos vehículos —cunha media de utilización superior á do coche privado— e contribúe á redución de emisións.
Mobify prevé ampliar este modelo a outros destinos galegos nos vindeiros anos, coa vista posta en eventos como o Xacobeo 2027 e no aumento do turismo internacional.