O CPEIG organiza unha nova edición da Olimpíada Informática Galega 2026 (OIG 2026)

Participantes na anterior edición da OIG

Dende o Colexio Profesional de Enxeñaría en Informática de Galicia (CPEIG) veñen de anunciar a Olimpíada Informática Galega 2026 (OIG 2026) en colaboración coas tres universidades públicas galegas: a Universidade da Coruña (UDC), a Universidade de Santiago (USC) e a Universidade de Vigo (UVigo).
Indo á OIG, dicir que está pensada para estudantes de centros públicos, concertados ou privados de Galicia matriculados no curso 2025/2026 en secundaria (ESO), bacharelato e ciclos formativos de grao medio e que sexan menores de 20 anos. A súa finalidade é a promoción do coñecemento e das vocacións nesta disciplina da informática tan presente en todos os eidos hoxe en día e precisa para a formación integral da mocidade.
A preinscrición para participar na Olimpíada Informática Galega estará aberta ata o vindeiro 23 de xaneiro, a través dun formulario habilitado na web da OIG. O número máximo de participantes será de 40. No caso de que o estudantado preinscrito supere ese número, a selección das 40 persoas participantes realizarase por orde de preinscrición. A listaxe de persoas seleccionadas e a listaxe de agarda darase a coñecer o 26 de xaneiro.
A olimpíada celebrarase de xeito presencial o venres, 6 de febreiro, na Facultade de Informática da Universidade da Coruña, en horario de 15:30 a 20:30 horas, coa colaboración da Facultade de Informática de Santiago e da Escola Superior de Enxeñaría Informática da UVigo no Campus de Ourense.
A competición consistirá na resolución de entre seis ou oito problemas nun prazo de tres horas. Cada problema deberá resolverse empregando unha linguaxe de programación que permita automatizar a súa resolución. Na OIG permítese o uso de C++, Python ou Java. Os problemas da olimpíada adoitan centrarse no deseño axeitado e eficiente de algoritmos. No caso de empate, terán prioridade os participantes de edicións anteriores en orde de clasificación e por orde de preinscrición.
A OIG permitirá seleccionar a dous representantes galegos para participar na XXX Olimpíada Informática Española (OIE), que se celebrará do 10 ao 12 de abril de 2026 na Escola de Enxeñaría en Informática da Universidade de Valladolid. De aí, as persoas gañadoras poderán acceder á Olimpíada Informática Internacional, que se celebrará en agosto do vindeiro ano en Uzbekistán.
Engadir que a olimpíada está habitualmente patrocinada por diversas entidades e empresas do sector TIC. Na edición de 2025 colaboraron: Apser Cloud Services, AWS, Clúster TIC Galicia, Denodo, Dinahosting, DXC Technology, PuntoGal, GDI, Mindata, Minsait, NTT Data, Oracle, Sixtema e Veritas. Grazas a estas entidades patrocinadoras, haberá premios adicionais para os seguintes postos na clasificación, ademais de para a mellor programadora feminina e para a/o mellor participante da ESO.