O Motorola One Fusion+ chega cun procesador Snapdragon 730 e xenerosa batería

Estes días está a chegar ao mercado español o Motorola One Fusion+, un smartphone con cámara cuádrupla cun sensor principal de 64 Mpíxeles e boa autonomía que busca convencer aos usuarios cunha pantalla Total Vision de 6,5 polgadas IPS Full HD+ e un son que promete graves 4 veces máis potentes, ou sexa, que estamos ante un teléfono que coida tanto a creación como a reprodución de contidos audiovisuais.
Este teléfono baseado en Android 10 funciona cun procesador Qualcomm Snapdragon 730 de 8 núcleos, 6 GB de RAM, 128 GB de almacenamento interno (ampliable mediante tarxetas microSD de até 1 TB), lector de impresións dixitais, botón para invocar ao Asistente de Google, Bluetooth 4.2, Wi-Fi AC, conector para auriculares e batería de 5.000 mAh con carga rápida de 15 watts.
A súa cámara traseira conta cun sensor principal de 64 Mpíxeles (capaz de tomar fotografías moi luminosas a 16 Mpíxeles), grande angular de 8 Mpíxeles, macro de 5 Mpíxeles e sensor de profundidade de 2 Mpíxeles, que pode gravar vídeo 4K a 30 imaxes por segundo e Full HD a 60/30 imaxes por segunod; mentres que a súa cámara frontal (periscópica) ten un sensor de 16 Mpíxeles.
Un dispositivo que como principal eiva ten a carencia de NFC, algo que sería bastante de agradecer nun teléfono que ten un prezo recomendado de 299 euros.