O director da AMTEGA participa nun encontro sobre soberanía tecnolóxica e IA

O director da AMTEGA, Julián Cerviño, participou esta mañá no evento Mistral e o futuro da IA no sector público, no que se abordaron as tendencias e retos europeos ligados á soberanía tecnolóxica en intelixencia artificial.
O encontro, organizado por Gartner, contou coa intervención de Arthur Mensch, CEO de Mistral, unha das compañías europeas máis destacadas no desenvolvemento de grandes modelos de linguaxe (LLM), quen expuxo a estratexia da empresa para fortalecer un ecosistema europeo sólido, independente e competitivo fronte ás grandes tecnoloxías globais.
Mistral é unha das poucas iniciativas europeas que compiten no mercado internacional dos LLM, un ámbito hoxe dominado por empresas estadounidenses e chinesas. O proxecto salienta pola súa aposta por modelos abertos, pola capacidade de execución local e polo control pleno sobre os datos e os procesos de inferencia.
Durante a reunión examinouse o potencial de contar cun LLM local e soberano, non dependente da nube nin das plataformas corporativas globais. Esta opción encaixa cos obxectivos do Programa Galego de Intelixencia Artificial, en concreto co Eixe 3 (Adopción estratéxica da IA), que prevé a posta en marcha dunha plataforma de servizos transversais de analítica avanzada de datos e intelixencia artificial. Esta plataforma inclúe tamén o desenvolvemento de modelos de linguaxe propios e a creación dun LLM galego, que permitiría á Xunta dispoñer de produtos e recursos sen estar condicionada por factores externos.
A iniciativa busca que Galicia conte con infraestruturas e capacidades tecnolóxicas propias que garantan seguridade, control dos datos públicos e privados e un aliñamento pleno co marco regulamentario europeo.