O foro Capital Network do Clúster TIC xuntou en Santiago os responsables de nove proxectos galegos cos seus investidores potenciais

O Hotel AC Palacio do Carme de Santiago acolleu este venres 14 a nova edición do foro Capital Network do Clúster TIC de Galicia, amais da presentación do seu Club de Investidores, iniciativa para facilitar o financiamento privado de proxectos TIC galegos. Nela participan empresas integradas na entidade, e conta co apoio de Xesgalicia. O club é, de feito, a gran novidade da quinta edición do Clúster TIC Capital Network (antes Vindeira Capital Network) con respecto ás anteriores convocatorias. Dito doutro xeito: a iniciativa do Clúster para favorecer a captación de investimentos para as nosas novas empresas TIC conta por vez primeira con investidores privados galegos grazas ao dito club.
En palabras de Antonio Rodriguez del Corral, presidente da plataforma empresarial galega, a entrada en xogo dos ditos fornecedores da nosa terra achega un salto cualitativo para o foro. “A fin de contas”, engadiu, “trátase dun proceso natural: que as empresas dunha terra concreta apoien aos emprendedores da súa contorna”.
Na rolda de traballo deste venres, o Clúster TIC Capital Network xuntou unha decena de start-ups seleccionadas, vindeiras candidatas para obteren financiamento. Ao longo da xuntanza (que durou toda a mañá) os emprendedores convocados presentaron cadansúas propostas de negocio baseadas nas TIC a un grupo de investidores especializados, na procura do financiamento que precisan. Os proxectos candidatos (unha boa parte dos cales teñen pasado por esta web amosando as súas liñas e obxectivos) son Avalingua, Cardi@ngel, Centum R&T, Opentrad, ParkApp, SetPay, Sigue tu liga, Situm e Todoencaja.
No encontro celebrado en Compostela, esta rolda de traballo que segue ao remate do proceso de selección (no que participaron, amais dos ditos proxectos aspirantes a financiamento, outros cinco proxectos máis), fíxose saber que Capital Network é un evento anual no sentido literal da expresión: celebrouse hoxe pero celébrase tamén ao longo de todo ano (“unha xanela aberta”), xuntando mediante diferentes actividades aos nosos emprendedores coas entidades de capital risco, os business angels do panorama estatal e nacional e os investidores privados que operan no sector TIC e nas contornas do mesmo.
Tamén se fixo saber que a través desta iniciativa, búscase afianzar o ecosistema emprendedor tecnolóxico galego, “acadando unha masa crítica de empresas orientadas á creación de produtos tecnolóxicos que permitan situar as industrias de Galicia como un referente recoñecido a nivel europeo”.
Tralas presentacións do evento perante a prensa, feitas por Antonio Rodríguez del Corral, presidente do Clúster TIC Galicia e Juan Cividanes, director xeral de Xesgalicia, viñeron as exposicións (formato elevator-pitch) das novas iniciativas de negocio propiamente ditas.
No evento tamén interveu Gerardo García, tesoureiro do Clúster TIC (e membro de Itelsis), quen lembrou que esta entidade empresarial galega ten, ante todo, vocación colaborativa. E todo, engadiu, a través dun obxectivo común: mellorar o noso sector TIC e, en última instancia, a nosa sociedade. De aí, desa finalidade compartida, xorde precisamente Capital Network, unha iniciativa para buscar investimento e apoio para os nosos proxectos innovadores. Neste senso, dixo, a mellor forma de facelo foi creando o devandito Club de Investidores, unha plataforma integrada por oito compañías e aberta á adhesión de cantas desexen apoiar os emprendedores do noso sector TIC.
Polo que respecta ao financiamento total que se busca nesta quinta convocatoria, Rodríguez del Corral sinalou que o requirido este ano polas novas iniciativas galegas é un investimento de 4 millóns de euros.