O talento, a IA e a sustentabilidade centraron o IX Encontro de Conselleiros de APD

A Asociación para o Progreso da Dirección (APD), en colaboración coa Asociación Galega da Empresa Familiar (AGEF) e KPMG, celebrou esta mañá a IX edición do seu Encontro de Conselleiros e Alta Dirección en Santiago de Compostela, reunindo a máis dun centenar de directivos e directivas de empresas galegas.
Na apertura do encontro, Roberto Tojeiro, vicepresidente da zona noroeste de APD e presidente de Gadisa, sinalou que esta novena edición celébrase en “un momento especialmente esixente para os órganos de goberno”, onde “os riscos tecnolóxicos, a presión sobre o talento, a necesidade de xerar crecemento sostible e a crecente complexidade regulamentaria están a elevar o nivel de responsabilidade do consello e da alta dirección”.
Pola súa banda, Tona Martínez, vogal da xunta directiva de AGEF e conselleira en FINSA, coincidiu co vicepresidente de APD ao sinalar que nos atopamos nun mundo especialmente convulso no que “é realmente importante acudir a este tipo de encontros”, facendo “un oco na axenda para reflexionar e ver que é o que están a facer ben outras empresas”.
Na apertura tamén participou Daniel Fraga, socio de KPMG en Galicia, que sinalou a importancia de xerar encontros de debate e coñecemento para “ter claro o rumbo das nosas empresas e saber surfear todos os cambios que se van sucedendo no mundo”. Ademais, o directivo sinalou que “en Galicia temos un tecido empresarial con vocación ao exterior, loitador e con expectativas de crecemento”.
Na primeira intervención da mañá, Daniel Fraga conversou con Carlota López, presidenta de Grupo ARESA abordando os retos e desafíos aos que se enfrontan os consellos, desde o impacto da xeopolítica, ata os sistemas de gobernanza. Seguindo este fío, a presidenta de ARESA sinalou que na súa compañía “a familia céntrase no longo prazo, mentres que o equipo directivo céntrase nas tarefas do día a día, con liberdade de acción. É o modelo que mellor nos funciona, ás veces as mellores persoas non teñen que levar o teu apelido, pero si adoptar a cultura da empresa".
Os avances tecnolóxicos tamén tiveron o seu protagonismo durante o encontro, abordando as implicacións estratéxicas do uso da IA xenerativa (e axéntica, a IA centrada na toma de decisións e a acción a autónomas) e os seus retos derivados na gobernanza do consello e a alta dirección. Esta temática foi abordada por Ana Peñuela, socia de CIO Advisory de KPMG; e Justo Hidalgo, director de IA da Asociación Española de Economía Dixital (ADigital). Os dous expertos conversaron sobre o procedemento real da creación de proxectos de intelixencia artificial e as dificultades á hora de establecelos nas empresas, marcando cinco piares básicos: estratexia, casos de uso, o ecosistema tecnolóxico, a capacitación das persoas e, por suposto, a gobernanza. De feito, os relatores sinalaron que o impacto na produtividade e competitividade nas empresas fai que a IA xa non sexa algo opcional, pero que tampouco pode substituír o criterio, a análise ou a experiencia humana.
A complexa simbiose entre os retos empresariais actuais e o avance da tecnoloxía, sumado á procura dun crecemento respectuoso cos recursos naturais, foi a cuestión que protagonizou a gran mesa redonda do encontro, onde Pedro León y Francia, socio do Board Leadership Center e responsable de Empresa Familiar en KPMG; conversou con Íñigo Alzueta, presidente executivo de CEAMSA; Gonzalo Redondo, director executivo (CEO) da firma local de telecomunicacións Televés, e Jorge Arteaga, CEO de Bandalux. Os tres relatores sinalaron a necesidade de que “a alta dirección sexa capaz de actuar con independencia, criterio e obxectividade”. Ademais de compartir as súas reflexións persoais ao redor dos seus papeis como directivos, os relatores sinalaron que a clave para o crecemento orgánico baséase en profundar nos seus procesos, buscando innovación interna “que sexa capaz de xerar novos produtos”.
A fidelización do talento desde o consello foi a protagonista da última mesa, na que participaron María Caridad García, presidenta de Granja Campomayor; e Elena Rodríguez de Robles, responsable de persoas e talento de Kaleido, baixo a moderación de José Ramón Cuervo, socio de Tax de KPMG en Galicia. Ambos relatores compartiron as súas experiencias profesionais ao redor da xestión de persoas e o talento nas súas respectivas empresas, remarcando a exemplaridade, a coherencia, a comunicación e o propósito como elementos cruciais para potenciar e fidelizar o talento.