Os novos móbiles de Samsung permitirán empregar Perplexity como asistente de IA

A surcoreana Samsung anunciou a ampliación de Galaxy AI coa incorporación dun novo asistente (Perplexity) no conxunto do ecosistema Galaxy, nun movemento que consolida a súa aposta por un modelo multi-asistente aberto, integrado e orientado a ofrecer maior flexibilidade ao usuario, e que podería ser un movemento para anticiparse ás esixencias dos reguladores para evitar o abuso de posición dominante no ámbito dos asistentes baseados en IA.
A estratexia de Samsung pasa por integrar a intelixencia artificial no propio sistema operativo, con conexións profundas a nivel de marco estrutural do dispositivo. En lugar de limitarse a funcións illadas dentro de aplicacións concretas, Galaxy AI opera a nivel de sistema, interpretando o contexto de uso para facilitar interaccións máis naturais e reducir o número de pasos necesarios nas tarefas cotiás.
Segundo datos internos da empresa, preto de oito de cada dez usuarios empregan actualmente máis de dous tipos distintos de asistentes de IA en función da tarefa que queiran realizar. Este cambio de comportamento levou a Samsung a evolucionar Galaxy AI cara a un modelo que permita escoller entre diferentes asistentes integrados, adaptando a experiencia ás preferencias e rutinas de cada persoa.
Como parte desta expansión, Samsung incorporará Perplexity como novo asistente de IA nos vindeiros dispositivos Galaxy de gama alta. Os usuarios poderán activar este servizo mediante unha frase de chamada específica («Hey Plex») ou a través de accesos rápidos, como manter premido o botón lateral do dispositivo.
Perplexity estará integrado de maneira profunda en aplicacións propias como Samsung Notes, Clock, Gallery, Reminder e Calendar, así como en determinadas aplicacións de terceiros. O obxectivo é permitir fluxos de traballo encadeados e máis fluídos, sen que o usuario teña que xestionar manualmente o salto entre aplicacións.