Os partidos políticos cataláns non aproveitaron a Rede nas súas campañas electorais

A consultora Multiplica realizou un estudio no que analizou as distintas webs electorais dos principais partidos políticos cataláns, debullando parámetros como o diálogo co elector, o achegamento co que se amosa o candidato, a facilidade para atopar datos ou a velocidade de acceso. Así, deducen que os políticos cataláns non aproveitaron os recursos da Rede nas súas campañas que veñen de rematar, de xeito que acadaron unhas puntuacións moi negativas, quedando mellor situado CiU (cun 5,89 sobre 10), seguido polo PSC (4,91), ERC (4,16), ICV (3,58) e o PPC (2,78).
Multiplica advirte de que os partidos non contan cunha estratexia de campaña a través das súas webs para dirixirse á mobilización da militancia virtual, de xeito que non acadan presenza máis aló das súas propias páxinas web (sorprenden as poucas ligazóns ás súas webs de campaña). Así, as webs dos partidos só parecen servir para deixar constancia da campaña tradicional, non contando con primicias nin elementos diferenzadores.