Qualcomm Snapdragon X2 Plus, a nova plataforma para PC con IA e autonomía de varios días

Qualcomm Technologies anunciou no CES de Las Vegas a plataforma Snapdragon X2 Plus, o novo integrante da serie Snapdragon X para ordenadores persoais. Con este lanzamento buscan ampliar o acceso a equipos con altas prestacións, gran eficiencia enerxética e capacidades avanzadas de intelixencia artificial dentro do ecosistema Windows 11 Copilot+ PC. Os primeiros dispositivos con Snapdragon X2 Plus, fabricados por distintos fabricantes, chegarán ao mercado durante a primeira metade de 2026.
A nova plataforma está orientada a profesionais, creadores emerxentes e usuarios xerais que demandan equipos rápidos, lixeiros e con autonomía prolongada. Segundo Qualcomm, Snapdragon X2 Plus permite combinar tarefas intensivas, como análise de datos, deseño creativo ou videoconferencias, sen comprometer rendemento nin duración da batería, un dos puntos nos que a compañía quere marcar diferenzas fronte ás xeracións anteriores.
No apartado técnico, Snapdragon X2 Plus integra a CPU Qualcomm Oryon de terceira xeración, que ofrece ata un 35 % máis de rendemento en tarefas dun só núcleo respecto á xeración previa, ao tempo que reduce o consumo enerxético nun 43 %. A isto súmase unha NPU Qualcomm Hexagon cunha capacidade de 80 TOPS, pensada para executar funcións de IA xerativa e experiencias axénticas directamente no dispositivo, facilitando a multitarefa e o procesamento local de datos.
A plataforma complétase con conectividade avanzada, incluíndo Wi-Fi 7 e a opción de 5G, así como co sistema de seguridade Snapdragon Guardian, orientado a reforzar a protección dos datos e do propio dispositivo en contornos profesionais e móbiles.
Este lanzamento busca responder ás expectativas dun mercado no que os usuarios queren máis potencia, máis autonomía e unha integración cada vez maior da intelixencia artificial no día a día.
Con esta nova plataforma, Qualcomm reforza a súa aposta polos PC baseados en arquitectura ARM e amplía a familia Snapdragon X, consolidando a súa presenza no segmento de portátiles con Windows 11 Copilot+ e acelerando a adopción de equipos con capacidades de IA integradas e maior eficiencia enerxética.